Жо Байден ва унинг оиласи намойишчилар ҳужумига учради (видео)

АҚШнинг собиқ президенти Жо Байден ва унинг оиласи Дублиндаги тадбирдан чиқаётганида намойишчилар ҳужумига учради. Хусусан, айримлар уларга яқинлашиб, турли буюмларни улоқтирди. Ҳодиса ортидан камида икки киши ҳибсга олинди. Бу ҳақда BBC хабар берди.

Қайд этилишича, воқеа кеча, 10 ноябрь куни Байденнинг Дублиндаги Тринити коллежига ташрифи вақтида юз берган. У коллежга рафиқаси Жилл Байден билан бирга борган. Улар ўғли Хантер Байденга жамоатчилик муҳокамаларига қўшган ҳиссаси учун Олтин медаль топшириш маросимида иштирок этган.

Байден ва унинг оиласи коллежнинг Тарих жамияти тадбирида бўлган пайтда бино ташқарисида Фаластин тарафдори бўлган намойишчилар йиғилган. Уларнинг айримлари Ирландия полицияси томонидан ушланган.

Ирландиянинг RTÉ телеканалининг хабар беришича, Байден ва унинг оиласи тадбир ўтказиладиган жойни тарк этаётганларида, баъзи одамлар олдинга силжишган ва нарсалар улоқтирган.

Ҳодиса жойига бир неча нафар полициячи ва жамоат тартибини сақлаш бўлинмаси ходимлари жалб қилинган. Камида икки киши ҳибсга олинган.

Эслатиб ўтамиз, аввалроқ АҚШнинг собиқ президенти Жо Байденнинг простата саратони танасининг бошқа қисмларига, жумладан, суякларига ҳам тарқалиб кетгани ҳақида хабар берилган эди.