Япония футболи раҳбари FIFA сиёсати сабаб истеъфога чиқди

Япония футбол ассоциацияси вице-президенти Такеши Окада Жаҳон чемпионатининг тижорат ҳуқуқларини сотиш билан боғлиқ можаро фонида истеъфога чиқди. Бу ҳақда ташкилот матбуот хизмати хабар берди.

“Мен спортга доимо олийжаноб машғулот сифатида қараганман ва унинг ижтимоий аҳамиятини қадрлаганман. Бироқ Жаҳон чемпионати билан боғлиқ сўнгги воқеалар менинг эътиқодларим ва амалий ҳаракатларим ўртасида сезиларли тафовут юзага келтирди. Спортчи сифатида мен бу ҳолатни қабул қила олмадим. Шу боис шундай қарорга келдим”, дейди Окада ўзининг расмий веб-сайтида эълон қилинган баёнотида.

Аввалроқ, Осиё футбол конфедерацияси (ОФК) FIFA президенти Жанни Инфантинони расман қўллаб-қувватлашини маълум қилган эди.

Жорий йилнинг август ойида ОФК раҳбари FIFA’нинг Жаҳон чемпионатига оид тижорат ҳуқуқларидаги улушни хусусий инвесторларга сотиш режасидан воз кечиш ҳақидаги қарорини маъқуллаган. “The Times” нашри аввалроқ Инфантино Жаҳон чемпионатини назорат қилиш учун тузилиши режалаштирилган янги ташкилотдаги улушни сотишни кўзлаётгани ҳақида хабар берган эди.

FIFA ўз расмий сайтида ташкилотнинг тижорат фаолияти ва мусобақаларни ўтказиш билан боғлиқ операцияларини бирлаштириши керак бўлган FIFA Forward Enterprise (FFE) компаниясини ташкил этиш режасини тасдиқлаган ҳамда хусусий инвесторларни ундан улуш сотиб олишга таклиф қилган. Кейинчалик FIFA матбуот хизмати бу лойиҳа хато бўлганлигини тан олиб, ундан бутунлай воз кечди.

Маълумот учун, Такеши Окада эса аввалроқ Япония миллий терма жамоасини 1998 ва 2010 йилги жаҳон чемпионатларида бошқарган. Унинг раҳбарлигида японлар 2010 йилги мусобақада 1/8 финалга қадар етиб борган.