Ўзбекистон Президенти Тўқаевни табриклади

Президент Шавкат Мирзиёев Қозоғистон Республикаси Президенти Қосим-Жомарт Тўқаевга мактуб йўллаб, мамлакатнинг янгиланган парламенти – Қурултойга сайловлар халқаро стандартлар ва демократик тамойиллар асосида муваффақиятли ўтказилгани билан самимий табриклади. Бу ҳақда Ўзбекистон Президентининг матбуот котиби Шерзод Асадов маълум қилди.

Қайд этилишича, давлат раҳбари ушбу тарихий воқеа Қозоғистон сиёсий тизимини такомиллаштириш, давлат бошқаруви самарадорлигини ошириш ва парламент ролини сезиларли даражада кучайтиришда янги босқични бошлаб берганини таъкидлаган.

Сайловларда фуқароларнинг фаол иштироки Қосим-Жомарт Тўқаев раҳбарлигида амалга оширилаётган, Қозоғистоннинг барқарор тараққиётини таъминлаш, унинг халқаро майдондаги нуфузи ва таъсирини янада оширишга қаратилган кенг кўламли конституциявий ва ижтимоий-сиёсий ислоҳотлар халқ томонидан кенг қўллаб-қувватланаётганининг ёрқин тасдиғи экани қайд этилган.

Ўзбекистон Президенти мамлакатда кўп асрлик дўстлик ва яхши қўшничилик ришталари билан боғланган қардош қозоқ халқи заминида бугун амалга оширилаётган кенг кўламли янгиланишларнинг юксак натижаларидан самимий мамнун эканини таъкидлаган.

Шунингдек, Ўзбекистон ва Қозоғистон парламентлари ўртасидаги яқин ҳамкорлик икки дўст мамлакат ўртасидаги стратегик шериклик ва иттифоқчилик муносабатлари руҳида янги сифат босқичига кўтарилишига ишонч билдирилган.

Якунда Президент Шавкат Мирзиёев Қосим-Жомарт Тўқаевга мустаҳкам соғлик, фаровонлик ва давлатчилик фаолиятида катта муваффақиятлар, қардош Қозоғистон халқига эса тинчлик ва равнақ тилаган.

Маълумот учун, Қозоғистонда кеча, 23 август куни тарихда илк бор янги бир палатали парламент – Қурултой депутатлари сайлови бўлиб ўтди. Сайловда 145 та депутатлик ўрни учун 7 та сиёсий партиядан 545 нафар номзод қатнашди. Овоз беришда 9,35 миллиондан ортиқ сайловчи иштирок этган, давомат 74,19 фоизни ташкил қилган.

Дастлабки экзитполларга кўра, Президент Қосим-Жомарт Тўқаевни қўллаб-қувватловчи “Адолат” партияси 70,7–72,3 фоиз овоз билан яққол пешқадам бўлган. “Овул” 6,2–6,4 фоиз, республикачилар 5,2–5,5 фоиз, “Оқ йўл” ва ОСДП эса қарийб 5 фоиз овоз олган. Қозоғистон Халқ партияси ва “Байтақ” 5 фоизлик натижадан ўта олмаган.

Сайлов мамлакатда янги Конституция қабул қилиниб, аввалги икки палатали парламент ўрнига бир палатали Қурултой ташкил этилганидан кейинги биринчи парламент сайлови бўлди. Расмий якуний натижалар эса ҳали эълон қилинмаган.

Эслатиб ўтамиз, аввалроқ Қозоғистон Президенти Қосим-Жомарт Тўқаев Қозоғистонда кенг кўламли модернизация амалга оширилаётганини айтиб, бўлажак Қурултой сайловларини мамлакат учун энг муҳим воқеалардан бири деб атаганди.