Ўлим билан курашаётган Байден илк бор кўриниш берди

Бугун, 10 август куни Жо Байден ўғли Хантер унинг простата саратони суякларига тарқалганини маълум қилганидан сўнг илк бор жамоатчилик олдида кўриниш берди. Бу ҳақда “Известия” хабар берди.

Нашрга кўра, у бугун Saint Joseph on the Brandywine черковида ўтказилган католик ибодат маросимида қатнашган. 83 ёшли Байденга Махфий хизмат ходимлари ҳамроҳлик қилган. Байден маросимдан чиқишда бошқа диндорлар билан суҳбатлашган ва автомобилига ўтириш вақтида жилмайган.

Собиқ президент кўк кўйлак, оч кўк пиджак ва жигарранг шим кийган. Қайд этилишича, у ўзининг туғилиб ўсган Делавэр штатида католик ибодат маросимларига мунтазам қатнашиб туради.

Бу Байденнинг ўғли Хантер унинг соғлиғи ҳақида сўнгги маълумотларни берганидан кейинги илк оммавий кўриниши бўлган.

Аввалроқ, Хантер Байден BBC’га берган интервьюсида отасининг соғлиғи ёмонлашгани ҳақида гапирганди. Унинг айтишича, отасининг простата саратони суякларига ва бошқа жойларига тарқалиб кетган.

Жо Байден саратон касаллигига чалинганини ўтган йилнинг май ойида, Оқ уйни тарк этганидан тўрт ой ўтмай маълум қилганди. У, аввалроқ саратон касаллиги сабабли радиация ва гормонал даволанишдан ўтган. Шунингдек, сентябрь ойида саратон ҳужайралари аниқланган тери қисмини олиб ташлаш бўйича жарроҳлик амалиётини бошдан кечирганди.

Байденнинг рафиқаси Жилл Байден ҳам жорий йилнинг июнь ойида турмуш ўртоғининг соғлиғи ҳақида гапирган. Унинг айтишича, агар Байденда фақат простата саратони аниқланганида, вазият бошқача бўлиши мумкин эди, бироқ касалликнинг суякларга метастаз бергани ҳолатни анча мураккаблаштирган.