Jo Bayden saraton kasalligi sababli operatsiya qilindi

AQSHning sobiq prezidenti Jo Bayden yaqinda saraton hujayralarini olib tashlash uchun operatsiya qilindi. Bu haqda bugun, 5 sentyabr kuni Qo‘shma Shtatlar sobiq rahbarining rasmiy vakiliga tayanib, NBC News telekanali xabar berdi.

Ta’kidlanishicha, operatsiya teri saratoniga qarshi kurashishda juda samarali hisoblangan "Moosa" usuli yordamida amalga oshirilgan. Bayden operatsiyadan so‘ng muvaffaqiyatli tuzalmoqda.

“Ushbu muolaja qachon amalga oshirilgani aniq emas, lekin avgust oyi oxiridagi videolardan birida uning (Jo Bayden) Delaverdagi cherkovdan chiqib ketayotgani va boshida yangi chandiq borligi ko‘ringan”, deb xabar berdi “Sky News”.

2023 yilda AQSH prezidenti lavozimida ishlaganida Bayden allaqachon teri saratonini olib tashlashdan o‘tgan edi. O‘sha paytda uning davolovchi shifokori Kevin O'Konnor aytganidek, operatsiya ko‘krak qafasida amalga oshirilgan, terining barcha zararlangan qatlamlari olib tashlangan va o‘sha paytda Bayden boshqa davolanishga muhtoj emas edi.

O‘sha yili Jill Baydenning ham saraton teri hujayralari olib tashlangan. Operatsiyalar ko‘z ustidagi va ko‘krak qafasidagi sohada amalga oshirilgan.

Eslatib o‘tamiz, joriy yil may oyi o‘rtalarida Jo Baydenga prostata saratoni tashxisi qo‘yilgani ma’lum bo‘lgandi. 82 yoshli siyosatchiga tashxis 16 may kuni qo‘yilgan. Shifokorlar uni siydik chiqarishdagi muammolar shikoyati tufayli ko‘rikdan o‘tkazib, prostata bezida “kichik tugun” borligini aniqlagan. Shifokorlar saraton agressiv shaklga ega bo‘lib, suyaklarga metastaz berganligini aniqladi.