Jo Baydenning saratoni suyaklariga tarqalib ketdi

AQSHning sobiq prezidenti Jo Baydenning prostata saratoni tanasining boshqa qismlariga, jumladan suyaklariga ham tarqaldi. Kasallik unga kuchli og‘riq bermoqda. Bu haqda uning o‘g‘li Xanter Bayden BBC telekanaliga bergan intervyusida ma’lum qildi.

Xanter Bayden otasining sog‘lig‘i haqida gapirar ekan, uning ahvolini kuzatish juda og‘ir ekanini aytgan.

“Saraton tarqaldi, metastazlar suyaklariga va undan ham boshqa joylarga o‘tgan. Bu juda og‘riqli va ko‘p jihatdan holsizlantiruvchi”, degan u.

83 yoshli Jo Bayden AQSH tarixidagi eng keksa prezident bo‘lgan. Uning yoshi prezidentlik davrining katta qismida xavotirlarga sabab bo‘lgan. Bayden va uning Oq uydagi maslahatchilari uning sog‘lig‘i bilan bog‘liq muammolarning ko‘lamini yashirganlikda keskin tanqid qilingan.

Jo Bayden saraton kasalligiga chalinganini 2025 yil may oyida, Oq uyni tark etganidan to‘rt oy o‘tmay ma’lum qilgan edi.

Xanter Bayden otasining kasalligi butun oila uchun og‘ir kechganini ta’kidlagan.

“Buni kuzatish juda achinarli. Otamning hozirgi sog‘lig‘i haqida aytadigan yagona gapim – u ko‘proq shikoyat qilsa edi, deb istardim. Chunki uning ahvoli yaxshi emas”, degan u.

Shunga qaramay, Xanter Baydenning aytishicha, otasi jamoatchilik oldida o‘zi muhim deb hisoblagan masalalar yuzasidan fikr bildirishda davom etmoqda.

“U hali ham o‘z ishini qilmoqda. U bu mamlakatga juda ishonadi”, degan Xanter Bayden.

Intervyuda Xanter Bayden otasi tomonidan unga berilgan afv haqida ham gapirgan. U mazkur qaror uchun otasidan minnatdor ekanini aytgan. Uning fikricha, agar Jo Bayden uni afv etmaganida, Donald Tramp undan qasos olishni so‘ragan bo‘lardi.
Shu bilan birga, Xanter Bayden bu qarorni tanqid qilish uchun asos borligini ham tan olgan.

“Bu oson tanqid qilinadigan qaror va bunga sabab ham bor. Men faqat otam buni men uchun qilganidan minnatdorman”, degan u.

Eslatib o‘tamiz, Jo Bayden 2025 yilda saraton hujayralarini olib tashlash uchun operatsiya qilingan edi.