Трамп республикачилар сайловларда нега ютқазиб қўйганини айтди

АҚШдаги оралиқ сайловларда Демократик партия Конгресснинг ҳар икки палатасида назоратни қўлга киритганидан сўнг мамлакат Президенти Дональд Трамп натижаларга муносабат билдирди. У республикачиларнинг мағлубиятини ўзининг сайловда иштирок этмагани билан изоҳлади. Бу ҳақда у ўзининг Truth Social ижтимоий тармоғидаги саҳифасида ёзди.

Трамп сайлов натижаларига изоҳ берар экан, унинг ўзи номзодлар рўйхатида бўлмаганини урғулаган.

“Мен сайлов бюллетенларида йўқ эдим. Агар номзодим қўйилганида, биз катта фарқ билан ғалаба қозонган бўлардик!” деб ёзди у.

Шунингдек, Трамп “Вето” ёзуви туширилган қизил бейсболка тасвирини эълон қилди. Бу орқали у Конгресснинг янги таркиби қабул қиладиган қонунларни блоклаш имкониятига ишора қилган.

Сайловлардаги энг кутилмаган натижалардан бири Техас штатида қайд этилди. Анъанавий равишда республикачилар таянчи ҳисобланган штатда демократ Жеймс Таларико Сенат сайловида Трамп қўллаб-қувватлаган Кен Пакстонни мағлуб этди.

Шунингдек, демократлар вакили Жина Инохоса губернаторлик сайловида ғалаба қозониб, штат тарихидаги лотин америкаси келиб чиқишига эга биринчи аёл губернаторга айланди.

Канзас штатида ҳам тарихий натижа қайд этилди. Пастор Адам Хэмилтон 1932 йилдан бери ушбу штатдан Сенатга сайланган биринчи демократ бўлди.

Демократлар Жоржия, Огайо ва Айова штатларидаги губернаторлик сайловларида ҳам ғалаба қозонди.

Шу билан бирга, республикачилар Флоридадаги мавқеини сақлаб қолди. Трампнинг иттифоқчиси Байрон Дональдс губернаторлик сайловида ғалаба қозонди, Эшли Муди эса Сенатдаги ўрнини сақлаб қолди.

Конгресс устидан назоратнинг йўқотилиши Трамп учун президентлик муддатининг қолган икки йилида сиёсий дастурини амалга оширишни қийинлаштиради. Демократлар маъмуриятнинг қонунчилик ташаббусларига тўсқинлик қилиш, парламент текширувларини ўтказиш ва ижро ҳокимияти вакилларини эшитувларга чақириш имкониятига эга бўлади. 

Эслатиб ўтамиз, аввалроқ Сенатда демократлар камида 54 та ўринга эга бўлаётгани, шу жумладан, Техас ва Канзасда – ўнлаб йиллар давомида республикачилар ғалаба қозониб келган штатлардаги пойгаларда зафар кучгани ҳақида хабар берилган эди. Вакиллар палатасида ҳам демократлар кўпчиликни қўлга киритишга муваффақ бўлди.