Трамп Эрон билан музокараларни тўхтатиб, Вэнсга янги вазифа юклади

АҚШ Президенти Дональд Трамп Эрон билан урушни якунлаш бўйича келишувга энди эҳтиёж йўқлигини билдирди. Шунингдек, Эрон билан музокараларни қайта бошлашга уринаётган вице-президент Жей Ди Вэнсга ички сиёсат билан шуғулланишни топширди. Бу ҳақда “The Guardian” хабар берди.

Трамп кеча, 12 ноябрь куни ўзининг ижтимоий тармоғида Вэнснинг эътиборини АҚШдаги демократлар бошқараётган шаҳар ва штатларда юз бераётган “улкан коррупция ва жиноятчилик”ка қарши курашга қаратишини ёзган.

Маълум қилинишича, Вэнс сўнгги вақтларда Эрон ва Қатар воситачилари билан урушни якунлаш бўйича музокараларни қайта бошлаш масаласини муҳокама қилаётганди. У Қатар Бош вазири Муҳаммад бин Абдураҳмон Ол Соний, Покистон армияси раҳбари Осим Мунир ва бошқа воситачилар билан деярли ҳар куни алоқада бўлган.

Бироқ Трамп музокараларни давом эттиришга ҳожат йўқлигини таъкидлаган.

“Бизга Эрон билан келишув керак эмас. Бундай кунлар аллақачон ортда қолди. Биз уларнинг юзлаб миллиард долларлик пулларига эга бўлдик ва Ҳормуз бўғозини ҳам назорат қиляпмиз”, деб ёзган у.

Ҳозирда АҚШ Эрон портларига нисбатан блокадани сақлаб турибди, Ҳормуз бўғози эса денгиз транспорти, жумладан, нефть ташувчи кемалар учун асосан қайта очилган. Шу билан бирга, сўнгги бир неча ой ичида АҚШ Эронга кенг кўламли зарбалар бермади, Эрон ҳам минтақадаги АҚШ ҳарбий базалари ва иттифоқчиларига қарши йирик баллистик ракета ҳужумларини амалга оширмади.

Трамп ўтган ҳафта ҳам уруш амалда якунланганини айтиб, Эронга қарши янги ҳарбий зарбалар берилиши эҳтимолини пасайтирган эди. Унинг сўзларига кўра, Форс кўрфази давлатлари раҳбарлари ҳам урушни қайта бошламасликни сўраган.

Бундан ташқари, Вэнс ўтган ҳафта Республикачилар партиясининг оралиқ сайловлардаги мағлубиятига Эрон билан уруш сабаб бўлганини айтган эди.

“Мағлубиятимизнинг сабаби – уруш. Президентнинг ўзи ҳам кеча шундай деди”, деб ёзганди у X ижтимоий тармоғида.

Эслатиб ўтамиз, аввалроқ АҚШ Президенти Дональд Трамп ҳозирча Эронга янги ҳужум уюштириш бўйича шошилинч режаси йўқлигини, бироқ зарурат туғилса, ҳарбий ҳаракатларга тайёр эканини билдирганди.