Тьерри Анри тақдирланди

Франция терма жамоаси сафида 1998 йилги жаҳон чемпиони Тьерри Анри UEFA президенти мукофотига сазовор бўлди. Бу ҳақда UEFA  матбуот хизмати хабар берди.

Тақдирлаш маросими кеча, 27 авнуст куни Монакода Чемпионлар лигаси қуръаси пайтида бўлиб ўтди. UEFA президенти Александр Чеферин “Арсенал”нинг собиқ ҳужумчисига совринни топширди.

Анри 49 ёшда. У футболчи сифатида “Монако”, “Ювентус”, Лондоннинг “Арсенал”, Испаниянинг “Барселона” ва АҚШнинг “Нью-Йорк Ред Буллз” жамоаларида ўйнаган. Франциялик футболчи “Арсенал”нинг барча даврлардаги энг яхши тўпурари ҳисобланади. У лондонликлар билан икки марта Англия чемпиони бўлган.

“Барселона” сафида Анри Чемпионлар лигаси, UEFA Суперкубоги ва FIFA Клублар ўртасидаги жаҳон чемпионатида ғолиб чиққан. Франция терма жамоаси билан эса 1998 йилги жаҳон чемпионати, 2000 йилги Европа чемпионати ва 2003 йилги Конфедерациялар кубогида чемпионликни қўлга киритган.