Саида Мирзиёева Орол денгизини экологик ечимлар майдонига айлантиришга чақирди (видео)

Орол денгизини шунчаки экологик фожиа рамзи бўлиб қолдирмасдан, экологик ечимлар учун синов майдонига айлантириш керак. Бу ҳақда Ўзбекистон Президенти Администрацияси раҳбари Саида Мирзиёева бугун, 24 сентябрь куни БМТ бош қароргоҳида бўлиб ўтаётган ташкилот Бош Ассамблеясининг 81-сессияси доирасида сўзлаган нутқида сўз очди.

Саида Мирзиёевага кўра, Марказий Осиёнинг бутун дунёга таклиф қилиши мумкин бўлган яна бир сабоғи бор. Бу – Орол денгизи.

Қайд этилишича, Орол денгизининг қуриб қолиши табиий офат оқибати эмас, балки ўнлаб йиллар давомида қабул қилинган нотўғри қарорлар ва табиатга адолатсиз муносабат натижасидир. Янги Ўзбекистон бу муаммо кўламини камайтириш учун қуриган денгиз тубида яшил ҳудудлар яратмоқда.

“Биз замонавий сув тежовчи технологияларни жорий этмоқдамиз. 2030 йилга бориб қайта тикланувчи энергия улушини 54 фоизга етказишни мақсад қилганмиз“, деган Президент Администрацияси раҳбари.

Саида Мирзиёеванинг таъкидлашича, Орол денгизи шунчаки экологик фожиа рамзи бўлиб қолмаслиги, балки экологик ечимлар учун синов майдонига айланиши керак.

“Биз Орол денгизининг шунчаки экологик фожиа рамзи бўлиб қолишини истамаймиз. У экологик ечимлар учун синов майдонига айланиши керак“, деган Президент Администрацияси раҳбари.

Шунингдек, унинг қўшимча қилишича, Ўзбекистон ташаббуси билан БМТ Бош Ассамблеяси 2027–2036 йилларни Ўрмонлаштириш ва қайта ўрмонлаштириш бўйича ҳаракатлар ўн йиллиги деб эълон қилган. Президент Администрацияси раҳбари мазкур резолюцияни амалий натижалар билан мустаҳкамлаш вақти келганини айтган.

Эслатиб ўтамиз, Саида Мирзиёева Бирлашган Миллатлар Ташкилоти Бош Ассамблеясидаги мазкур нутқида Ўзбекистон келгуси йилда Қўшилмаслик ҳаракатига раислик қилишини маълум қилган эди. Шунингдек, Президент Администрацияси раҳбари Ўзбекистон учун инсон қадри, унинг ҳуқуқ ва манфаатлари ҳар қандай ҳарбий ҳамда иқтисодий салоҳиятдан устун туришини айтганди.