Россия Украина билан урушда соатига 70 аскарини йўқотяпти – “Bloomberg”

Жорий йилнинг октябрь ойи Украинадаги Россия армияси учун ҳалок бўлган ва ярадор ҳарбийлар сони бўйича янги рекорд билан якунланди. Россия қўшинлари умумий ҳисобда 54 мингга яқин одамини йўқотди. Бу ҳақда Европа разведкалари маълумотларига таяниб, “Bloomberg” хабар берди.

Нашрнинг ёзишича, кеча, 1 ноябрь куни Украина Президенти Владимир Зеленский ҳалок бўлганлар ва ярадорлар сони бир ойда 54,4 минг кишини ташкил этганини эълон қилган. Европа расмийларида ҳам шунга ўхшаш маълумотлар бор. Шу билан бирга, йўқотишлар орасида ҳалок бўлганларнинг улуши ҳам рекорд даражага етган.

“Кремль томонидан Донбассни нима қилиб бўлса ҳам эгаллаш вазифаси қўйилган Россия Бош штаби генераллари ҳафтасига ўртача 12 минг, кунига 1,7 мингдан ортиқ ва соатига 70 дан ортиқ одамини йўқотган”, дейилади “Bloomberg” хабарида.  

АҚШнинг Урушни ўрганиш институти (ISW) баҳолашича, шунга қарамай, Россия армияси октябрь ойини кетма-кет иккинчи ой ҳудудларнинг соф йўқотилиши билан якунлаган – тахминан 160 кв км. Сентябрь ойида ҳам Россия армияси назорати остидаги ҳудуд 80,8 кв км га қисқарган.

Ўтаётган йилнинг 10 ойи якунларига кўра, Россия генераллари томонидан уюштирилган рекорд даражадаги “гўштли ҳужумлар”га қарамай, Украина 1 январь ҳолатига кўра назорат қилган ҳудудининг бор-йўғи 0,2 фоизини йўқотган. “DeepState” ҳисоб-китобларига кўра, октябрь ва сентябрь ойларида Россия армияси ойига 7 мингга яқин “ҳужум ҳаракатлари”ни амалга оширган, августда эса бу кўрсаткич 8 мингга яқинни ташкил этган. Бу ўтган йилгидан 18-30 фоизга кўп.

“The Economist” ҳисоб-китобларига кўра, октябрь ойи охирида Украинада ҳалок бўлган россиялик ҳарбийлар сони 770 минг кишига етган бўлиши мумкин. Бу Ижевск (616 мингдан ортиқ киши), Барнаул (622 мингдан ортиқ) ёки Тольятти (660 мингдан ортиқ) каби шаҳарлар аҳолисининг умумий сонидан кўп ва Якутск ҳамда Брянск шаҳарлари аҳолисининг биргаликдаги сонига тенг дегани.