Пул эвазига аёлга яқин муносабат таклиф қилган 19 ёшли йигит қамалди

Фарғона вилоятининг Сўх туманида аёлга шаҳвоний шилқимлик қилган 19 ёшли йигитга 4 сутка маъмурий қамоқ жазоси тайинланди. QALAMPIR.UZ суд ҳужжати билан танишди.

Жиноят ишлари бўйича Сўх туман судининг жорий йилнинг 20 август куни чиқарган қарорига кўра, 2007 йилда туғилган Ҳ.И. 10 август куни соат 10:30 атрофида Қизилқиёқ маҳалласидаги 12-сонли мактаб олдида Н.Ш. га нисбатан шаҳвоний шилқимлик қилган. У аёлга нисбатан номақбул ва шаҳвоний мазмундаги гапларни айтиб, пул эвазига яқин муносабат таклиф қилган.

Ҳ.И. судда қилмишини тан олган ва пушаймонлигини билдирган. У аёлни танимаслигини, гапларни ҳазил тариқасида айтганини, кейинчалик унинг ёши катта эканини билганини айтган. Н.Ш. эса судда воқеани тасдиқлаб, Ҳ.И. нинг гапларидан норози бўлгани ва ҳолат юзасидан ички ишлар органларига мурожаат қилганини билдирган.

Суд Ҳ.И. нинг ҳаракатларини Маъмурий жавобгарлик тўғрисидаги кодекснинг 41-1-моддаси (шаҳвоний шилқимлик қилиш) 1-қисми билан тўғри квалификация қилинган деб топган. Унга 4 сутка маъмурий қамоқ жазоси тайинланган.

Эслатиб ўтамиз, аввалроқ Сурхондарё вилоятининг Термиз тумани Тиббиёт бирлашмасида ташкилий методика бўлими бошлиғи бўлиб ишлаган шахс ногиронликдан даволаниш учун ордер сўраб мурожаат қилган аёлга жинсий яқинликни таклиф қилгани учун 3 суткага қамалгани ҳақида хабар берилган эди.