Президент “Ширин” массивида ишлар суст бораётганини танқид қилди

Самарқанд шаҳридаги “Ширин” массиви қурилишига Янги Тошкент билан бир кунда старт берилган, бироқ у ерда ишлар суст боряпти. Бу ҳақда бугун, 12 октябрь куни Президент Шавкат Мирзиёев Янги Тошкент қурилишини жадаллаштириш масалалари юзасидан инвестор ва тадбиркорлар билан ўтказилаётган очиқ мулоқотда сўз очди.

Президент Самарқанд шаҳридаги “Ширин” массиви қурилишига Янги Тошкент билан бир кунда старт берилганини эслатган. Бироқ у ерда ишлар суст бораётгани танқид қилинган: тадбиркорларга атиги 19 гектар ажратилган, қолган майдонлар бўш турибди.

Массивни шаҳар маркази билан боғлайдиган кўприк 1 сентябргача ишга туширилиши керак эди. Вилоят ҳокимлиги ва бошқармалар биноларини кўчириш ҳали ҳам бошланмаган. Давлат идораларининг ўзи фаоллик кўрсатмаётгани тадбиркорларнинг сармоя киритиш қарорларига таъсир қилаётгани айтилган.

Шу боис, Янги Тошкент учун эълон қилинган имтиёз ва имкониятлар “Ширин” массивига ҳам татбиқ этилади. У ерда ҳам инвесторларга аниқ лойиҳалар ва ишлаш учун қулай шартлар таклиф қилиниши лозим.