Президент АҚШ Конгресси Вакиллар палатаси делегациясини қабул қилди 

Президент Шавкат Мирзиёев Америка Қўшма Штатлари Конгресси Вакиллар палатасининг конгрессменлар Жейсон Смит, Грег Мерфи, Ронни Жексон ва Эдвард Кейсдан иборат делегациясини қабул қилди. Бу ҳақда Ўзбекистон етакчисининг матбуот хизмати хабар берди.

Қайд этилишича, учрашув аввалида америкалик қонун чиқарувчилар Ўзбекистон Президенти ва халқини мамлакат мустақиллигининг 35 йиллиги билан самимий қутлаган. Шундан сўнг, томонлар Ўзбекистон ва АҚШ ўртасидаги стратегик шериклик муносабатларини янада мустаҳкамлаш ҳамда парламентлараро ҳамкорликни ривожлантириш масалаларини кўриб чиққан.

Икки томонлама муносабатларда ижобий суръат кузатилаётгани, сиёсий мулоқот юқори даражада экани, алоқалар ва ўзаро ташрифлар фаоллашгани мамнуният билан қайд этилган. Икки мамлакат етакчилари яқинда бўлиб ўтган телефон орқали мулоқот чоғида стратегик шерикликни янада кенгайтиришнинг устувор йўналишларини белгилаб олган.

Шунингдек, учрашувда савдо-иқтисодий ҳамкорликни ривожлантиришга ҳам алоҳида эътибор қаратилган. Маълум қилинишича, жорий йил бошидан ўзаро савдо ҳажми 20 фоизга ошган. Энергетика, муҳим минераллар, транспорт, қишлоқ хўжалиги, рақамли технологиялар ва саноат соҳаларида йирик лойиҳаларни бошлаш ва амалга оширишни назарда тутувчи уч йиллик Иқтисодий ҳамкорлик дастури изчил амалга оширилмоқда.

Ўзбекистонда амалга оширилаётган кенг кўламли ислоҳотларни қўллаб-қувватлашда, шунингдек, икки мамлакат ўртасидаги конструктив ва ўзаро манфаатли мулоқотни илгари суришда АҚШ Конгрессининг муҳим ўрни қайд этилган.

Бундан ташқари, ҳудудлараро ҳамкорликни кенгайтиришга алоҳида эътибор қаратилган. АҚШ делегацияси аъзолари вакиллик қилаётган Миссури, Шимолий Каролина, Техас ва Гавайи штатлари билан тўғридан-тўғри алоқаларни янада ривожлантириш ва қўшма лойиҳаларни амалга оширишга тайёрлик билдирилган.

Минтақавий ва халқаро аҳамиятга молик долзарб масалалар юзасидан ҳам фикр алмашилган. Учрашув якунида эса ишбилармонлик миссияларининг ўзаро ташрифларини ташкил этишга келишиб олинган.

Эслатиб ўтамиз, жорий йилнинг 7 август куни Президенти Шавкат Мирзиёевнинг Америка Қўшма Штатлари Президенти Дональд Трамп билан телефон орқали мулоқоти бўлиб ўтганди. Суҳбат якунида Шавкат Мирзиёев Президент Дональд Трампга ўзи учун қулай вақтда расмий ташриф билан мамлакатга келишни таклиф қилганди.