Португалия футболчиларига Ўзбекистон билан ўйин катта экранда қўйиб берилди (видео)

Португалия терма жамоаси футболчилари 2026 йилги Жаҳон чемпионатида Ўзбекистонга қарши ўтказилган учрашувни таҳлил қилди. Ушбу ҳолат акс этган видео Португалия футбол федерацияси матбуот хизмати томонидан эълон қилинди.

Унда Бруну Фернандеш ва Нуно Мендеш каби футболчилар Ўзбекистонга қарши кечган баҳснинг муҳим вазиятларини катта экранда қайта томоша қилиб, таҳлил қилаётгани акс этган. “Қайдлар олинг. Кўриб чиқинг. Таҳлил қилинг. Яхшиланг”, дея ёзилган видео изоҳида.

Маълумот учун, Жаҳон чемпионати гуруҳ босқичининг иккинчи турида Португалия Ўзбекистонни 5:0 ҳисобида мағлуб этган эди. Португалияликлар сафида Криштиану Роналду дубль қайд этди, Нуно Мендеш ва Рафаэл Леау биттадан гол урди. Ўзбекистон терма жамоаси дарвозабони Абдувоҳид Неъматов эса автоголга муаллифлик қилди.

Ушбу ғалабадан сўнг Португалия “К” гуруҳида 4 очко билан иккинчи ўринда бормоқда. Ўзбекистон эса ҳали очко жамғара олмаган ҳолда гуруҳда тўртинчи ўринда турибди. Гуруҳ босқичининг сўнгги турида Португалия Майами шаҳрида Колумбияга қарши майдонга тушади. Ўзбекистон эса Атланта шаҳрида Конго Демократик Республикаси билан баҳс олиб боради.

Эслатиб ўтамиз, Конго Демократик Республикаси терма жамоаси бош мураббийи Себастьян Десабр Ўзбекистонга қарши бўлажак учрашувда таваккал қилишини ва фақат ғалаба учун ўйнашини айтгани ҳақида хабар берилганди.