Конго ДР мураббийи Ўзбекистонга қарши ўйин ҳақида гапирди

Конго Демократик Республикаси терма жамоаси бош мураббийи Себастьян Десабр Ўзбекистонга қарши бўлажак учрашувда таваккал қилишини ва фақат ғалаба учун ўйнашини айтди. Бу ҳақда у Колумбияга қарши ўйиндан сўнг матбуот анжуманида сўз очди.

“Ўзбекистонга қарши ўйин осон бўлмайди, чунки улар яхши ҳимояланади. Аммо биз бор кучимизни сарфлаймиз. Ҳозир дам олишимиз ва куч тўплашимиз керак. Бу учрашувда таваккал қилишимизга тўғри келади, чунки дуранг бизни қаноатлантирмайди. 3-тур мутлақо бошқача ёндашувни талаб қиладиган ўйин бўлади, дастлабки иккита ўйинга қараганда кўпроқ таваккал қилишимизга тўғри келади”, дейди у.

Шунингдек, мураббий Колумбияга қарши учрашувдаги мағлубият ҳақида ҳам ўз фикрларини билдириб ўтган.

“Биз бу мағлубиятни қабул қилишимиз, бошимизни баланд тутишимиз ва имкон қадар тезроқ курашга қайтишимиз керак. Албатта, дуранг қайд этиш яхши бўларди, аммо Колумбия кучлироқ жамоа бўлганини тан олиш лозим. Улар тўпни жуда яхши назорат қилди, биз эса ўйинга кечроқ қўшилдик. Иккинчи бўлимда яхшироқ ҳаракат қилдик, аммо бу – футбол. Нима бўлганини таҳлил қилиб, олдинга қарашимиз керак”, дейди Десабр.

Маълумот учун, Конго Демократик Республикаси ва Ўзбекистон терма жамоалари ўртасидаги учрашув жорий йил 28 июнь куни тонгда АҚШнинг Атланта шаҳрида Тошкент вақти билан соат 4:30 да бошланади. Ушбу баҳсда ғалаба қозонган жамоа гуруҳда 3-ўринни эгаллаб, энг яхшилар қаторида плей-оффга чиқиши мумкин бўлади.