Месси Аргентина терма жамоасига қанча даромад келтиргани маълум бўлди

Аргентина футбол ассоциацияси (AFA) Лионель Мессининг терма жамоадаги фаолияти давомида 121 миллион доллар миқдорида мукофот пули ишлаб олди. Бу ҳисоб-китобни “Diario AS” нашри келтирди.

Манбага кўра, ушбу маблағнинг асосий қисми йирик мусобақалардаги муваффақиятлар учун берилган мукофотлар ҳисобига тўғри келади.

2019 йилда Аргентина Копа Америкада учинчи ўринни эгаллаб, 8 миллион доллар мукофот пули олган. 2021 йилда эса жамоа ушбу турнирда ғолиб чиқиб, AFA ҳисоб рақамига яна 10 миллион доллар қўшган.

Асосий даромад 2022 йилда Қатарда ўтказилган Жаҳон чемпионатидаги ғалабадан келган. Аргентина турнирда чемпион бўлгани учун FIFA’дан 42 миллион евро, CONMEBOL’дан эса қўшимча 10 миллион евро олган. 2024 йилги Копа Америкада ҳам Аргентина ғолиб чиқиб, 16 миллион евро миқдорида мукофот пулига эга бўлган.

Маълумот учун, Месси 2005 йилдан буён Аргентина терма жамоаси сафида тўп тепиб келади. У 2022 йилги Жаҳон чемпионати ва икки марта Копа Америка ғолиби ҳисобланади.

Эслатиб ўтамиз, кеча, 7 октябрь куни Месси Аргентина терма жамоаси сафида Бенинга қарши хайрлашув учрашувини ўтказди. У 71-дақиқада гол уриб, терма жамоадаги голлари сонини 126 тага етказди. Шунингдек, Месси учрашувдаги 2 та голли узатмани амалга оширди.