Месси Аргентина терма жамоаси сафидаги сўнгги ўйинини ўтказди

Бугун, 7 октябрь куни Лионель Месси Аргентина терма жамоаси сафидаги сўнгги учрашувини ўтказди. Бенин терма жамоасига қарши бўлиб ўтган учрашувда аргентиналиклар 3:0 ҳисобида ғалаба қозонди.

“Альбиселесте” сардори ушбу баҳсда жамоасининг учала голида ҳам бевосита иштирок этиб, битта гол урди ва иккита голли узатмани амалга оширди.

Аргентина 48-дақиқада ҳисобни очди. Месси бурчак тўпини узатди, Николас Отаменди эса тўпни ҳавода зарба билан дарвозага жойлади. Ушбу учрашув ҳимоячининг ҳам миллий терма жамоа сафидаги сўнгги ўйини бўлди.

61-дақиқада Месси Ники Пасга голли узатма берди ва у мезбонларнинг устунлигини оширди. Яна ўн дақиқа ўтиб, 39 ёшли аргентиналик футболчи пенальтини аниқ амалга ошириб, ҳисобни 3:0 кўринишига келтирди.

Шу тариқа, Месси Аргентина терма жамоасидаги фаолиятини ўйинлар, голлар ва голли узатмалар сони бўйича рекордчи сифатида якунлади.

Учрашувдан кейин Месси ҳиссиётларини яширмади. Унинг сўзларидан иқтибос келтирган TyC Sports нашри футболчининг отаси ҳақидаги хотиралари ва терма жамоа билан хайрлашиш унга осон бўлмаётганини ёзди.

“Бугун нимадир дейиш қийин. Ҳиссиётларга тўлиб кетганман, хаёлимда жуда кўп фикрлар айланяпти. Биринчи бўлиб отам хаёлимга келди.
Мен қила оладиган ягона нарса – хайрлашув нутқимда айтганимдек, барчага миннатдорчилик билдириш. Бу футболкани 20 йилдан ортиқ кийиш мен учун катта шараф бўлди. Ҳатто энг қийин пайтларда ҳам курашишдан тўхтамадим, доимо бор кучимни сарфладим. Терма жамоадан кетиш мен учун жуда оғир бўлади. Қасам ичаманки, бу ерга абадий келишни истардим. Чунки Аргентина терма жамоасида ўйнаш – инсоннинг бошидан кечириши мумкин бўлган энг яхши нарса”, дейди Месси учрашувдан сўнг.

Шунингдек, Месси терма жамоани танқид қилганлар ҳақида ҳам фикр билдирди.

“Яқинда бўлиб ўтган Жаҳон чемпионати ҳақида ҳам гапирмоқчиман. Бу йил биз ғалабага яқин эдик, аммо... Биламан, кўпчилик биз ҳақимизда турли гапларни айтди. Бироқ бундай гаплар учун ҳеч қандай асос йўқ эди.
Миллий жамоамизнинг муваффақиятсизликка учрашини истайдиган одамлар бор. Биз уларга бунчалик қониқиш ҳиссини бермаслигимиз керак.
2022 йилда Жаҳон чемпионатида ғалаба қозонганимиздан кейин қандай байрам қилганимизни эслайман. Бу хотира мен билан абадий қолади. Қўллаб-қувватлаганингиз учун барчангизга раҳмат. Сизларни жуда яхши кўраман”, дейди аргентиналик футболчи.

Маълумот учун, Лионель Месси миллий терма жамоадаги дебютини 2005 йилда ўтказган. У фаолияти давомида миллий жамоа сафида 208 та учрашувда иштирок этиб, 126 та гол ва 68 та голли узатмани амалга оширган. Месси Аргентира билан 1 марта Жаҳон чемпионати ғолиблиги, 2 марта Америка Кубоги ғолиблиги, 1 марта Финалиссима ғолиблиги ва 2008 йил Пекин Олимпия ўйинлари олтин медали соҳиби бўлган.

Шу тариқа, футбол тарихидаги энг буюк ўйинчилардан бири Лионель Месси Аргентина терма жамоаси сафидаги халқаро фаолиятини якунлади.