Макрон Ринернинг президентлик сайловларида иштирок этиш қарорини олқишлади

Франция Президенти Эммануэль Макрон дзюдо бўйича Олимпия чемпиони Тедди Ринернинг 2027 йилги президентлик сайловларида номзодини қўйиш қарорини олқишлади. Бу ҳақда Макрон “France 5” телеканалига берган интервьюсида гапирди.

“Буюк чемпион Тедди Ринер каби инсоннинг президентлик сайловлари муҳокамасида иштирок этишга, ўз қарашлари, ғоялари ва истеъдодини намоён этишга қарор қилганидан жуда хурсандман. Бу, шубҳасиз, мамлакат учун фойдали бўлади”, дейди Макрон.

Франция Президенти янги номзоднинг дастлабки баёнотлари ва сайловдаги имкониятлари ҳақида фикр билдиришдан тийилган. У президентлик кампаниясига аралашишни истамаслигини таъкидлаган.

Шу билан бирга, Макрон Ринерни буюк спортчи ва “мамлакат фахри” деб атаган. Шунингдек, “миллат ҳаёти фақат профессионал сиёсатчиларга тегишли эмас”лигини таъкидлаб, ўзининг 2017 йилги президентлик сайловларидаги иштирокини мисол қилиб келтирган.

Эслатиб ўтамиз, аввалроқ Ринер президентлик сайловларида номзодини қўйиш нияти борлигини маълум қилган эди. Ижтимоий тармоқларда эълон қилинган видеомурожаатида спортчи сиёсий тажрибага эга эмаслигини тан олган. Бироқ унинг фикрича, оғир иқтисодий ва ижтимоий вазият, шунингдек, жамиятдаги бўлинишлар шароитида Францияга “маъруза ўқиб, бекор юрадиган профессионал сиёсатчилар эмас”, балки “соғлом фикр, қатъият, адолат ва тартибни тиклайдиган давлат” керак.

37 ёшли дзюдочи беш карра Олимпия чемпиони бўлиб, Франциянинг энг машҳур шахслари рейтингларида мунтазам равишда юқори ўринларни эгаллаб келади.

“Harris Interactive” компанияси томонидан кеча, 9 ноябрь куни ўтказилган сўнгги сўров натижаларига кўра, сўровда қатнашган 1000 нафар катта ёшли французнинг 10 фоизи Ринерга овоз бериш эҳтимоли юқори эканини билдирган. Бироқ компания бу кўрсаткич фақат номзоднинг “сайлов салоҳияти”ни акс эттиришини таъкидлаган.

Рейтингда ўнг қанотдаги “Миллий бирлашув” партияси вакили Марин Ле Пен етакчилик қилмоқда. Сўров иштирокчиларининг 46 фоизи унга овоз беришга тайёрлигини билдирган.

Франция президентлик сайловларининг биринчи босқичи 2027 йил 18 апрель кунига белгиланган. Агар номзодлардан ҳеч бири 50 фоиздан ортиқ овоз тўплай олмаса, энг кўп овоз олган икки номзод 2 май куни иккинчи босқичда иштирок этади.

Маълумот учун, Ринер 2012, 2016 ва 2024 йилги Олимпиадаларда 100 кг дан ортиқ вазн тоифасида олтин медални қўлга киритган, шунингдек, Токио ва Парижда жамоавий турнирларда зафар қучган. Эътиборли жиҳати шундаки, Тедди Ринер 2008 йилда Пекинда бўлиб ўтган Олимпия ўйинларида бронза медалини қўлга киритган. Ўшанда 19 ёшли Ринер 100 кг дан ортиқ вазн тоифасида ярим финалгача етиб бориб, ўзбекистонлик дзюдочи Абдулла Тангриевга ютқазиб қўйган. Тангриев олтин медаль учун кечган кескин беллашувда Япония вакили Сатоши Ишиига мағлуб бўлиб, фаолиятидаги энг юқори Олимпия мукофоти – кумуш медалга эга чиққан.