Абдулла Тангриевга ютқазган дзюдочи Франция президенти бўлмоқчи

Дзюдо бўйича беш карра олимпия чемпиони ва 12 карра жаҳон чемпиони Тедди Ринер 2027 йилда Франция президентлигига ўз номзодини қўяди. Бу ҳақда 37 ёшли Ринер X ижтимоий тармоғидаги саҳифасида маълум қилди.

Ринер ўзининг “ўнглар тарафдори ҳам, сўллар тарафдори ҳам эмаслигини” ва “бирлаштирувчи президент” бўлишга интилаётганини маълум қилган.

У ҳозирча амалдаги Президент Эмманюэль Макроннинг фаолиятига баҳо бермаслигини айтган. 

“Мен айбдорларни қидирмаяпман. Мен ечимларни топиш учун шу ердаман”, дея қўшимча қилган дзюдочи. 

Ринернинг сўзларига кўра, у сайловолди кампаниясини “ўз чўнтагидан” молиялаштиради ва зарур бўлган 500 та имзони тўплашига ишончи комил. Францияда президентлик сайловлари 18 апрель куни бўлиб ўтади.

Маълумот учун, Ринер 2012, 2016 ва 2024 йилги Олимпиадаларда 100 кг дан ортиқ вазн тоифасида олтин медални қўлга киритган, шунингдек, Токио ва Парижда жамоавий турнирларда зафар қучган. Эътиборли жиҳати шундаки, Тедди Ринер 2008 йилда Пекинда бўлиб ўтган Олимпия ўйинларида бронза медалини қўлга киритган. Ўшанда 19 ёшли Ринер 100 кг дан ортиқ вазн тоифасида ярим финалгача етиб бориб, ўзбекистонлик дзюдочи Абдулла Тангриевга ютқазиб қўйган. Тангриев олтин медаль учун кечган кескин беллашувда Япония вакили Сатоши Ишиига мағлуб бўлиб, фаолиятидаги энг юқори Олимпия мукофоти – кумуш медалга эга чиққан.