Кўчирмакашликда айбланган профессор ўлик ҳолда топилди

Кембриж университетининг энг ёш қора танли профессори бўлган британиялик социолог Жейсон Ардей кеча, 14 август куни Лондоннинг Баттерси ҳудудидаги уйда ўлик ҳолда топилди. Бу ҳақда “Associated Press” хабар берди.

Ардей 2023 йилда 37 ёшида Кембриж университетининг энг ёш қора танли профессори бўлган. У ўтган ҳафта илмий фаолиятидаги плагиат айбловлари ва кучайган жамоатчилик босими ортидан университетдаги лавозимидан истеъфога чиққан.

Британия ОАВлари хабарларига кўра, Ардей 14 август куни тушдан кейин уйида ҳушсиз ҳолатда топилган. Лондон Метрополитен полицияси 41 ёшли эркак Баттерси ҳудудида вафот этганини тасдиқлаган. Полиция унинг ўлимини кутилмаган ҳодиса деб баҳолаган, бироқ шубҳали деб ҳисобламаган.

Ардей ўзига билдирилган плагиат айбловларини рад этган, бироқ докторлик диссертацияси устида ишлаш жараёнида айрим хатоларга йўл қўйганини тан олган. Унинг 2015 йилда ҳимоя қилган докторлик диссертациясида бошқа тадқиқотчининг аввалги ишига ўхшаш ёки айнан бир хил бўлган бир нечта парчалар борлиги ҳақида хабарлар тарқалган.

Шунингдек, унинг спорт ва хайрия фаолияти ҳақидаги айрим даъволари ҳам шубҳа остига олинган. Жумладан, Ардей хайрия учун 5,5 миллион фунт стерлинг маблағ тўплагани, 35 кун ичида 30 та марафонда қатнашгани ва олти кун ичида 600 мил масофани босиб ўтгани ҳақида маълумот берган.

Кембриж университети дастлаб Ардейни ҳимоя қилган ва плагиат ҳақидаги даъволар у докторлик даражасини олган Ливерпуль Жон Мурес университети томонидан текширилганини билдирган. Кейинчалик эса Ардейнинг илмий даражаси ва фахрий лавозимларига оид янги маълумотлар сабаб ички текширув бошланганини маълум қилган.

Ардей истеъфога чиқиши ҳақидаги баёнотида тинмай айбловлар, тахминлар ва жамоатчилик муҳокамалари ўзига ҳамда яқинларига жиддий таъсир қилганини билдирган. У истеъфосини ўзига нисбатан билдирилган даъволарни тан олиши сифатида қабул қилмаслик кераклигини таъкидлаган.

Эслатиб ўтамиз, аввалроқ Саудия Арабистони қироллик оиласи аъзоси Абдуллоҳ бин Фаҳд бин Абдуллоҳ бин Абдулазиз бин Жаллавий Ол Сауд Лондондаги ҳашаматли меҳмонхонада ўлик ҳолда топилгани ҳақида хабар берилган эди.