Хитойда кўп қаватли уйда ёнғин чиқиб, 14 киши ҳалок бўлди (видео)

Хитой шимолидаги Шанси провинциясида жойлашган турар жой биносида ёнғин содир бўлди. Ҳодиса оқибатида камида 14 киши ҳалок бўлиб, яна 38 киши шифохонага юборилди. Бу ҳақда “Синьхуа” агентлиги хабар берди.

Маълум қилинишича, ёнғин кеча, 8 ноябрь куни соат 17:00 атрофида Шанси провинциясининг Тайюань шаҳридаги Ингзе тумани Люсян мавзесида бошланган. Олов турар жой биносини қамраб олган. Ёнғин соат 19:00 га келиб ўчирилган, қидирув-қутқарув ишлари эса 20:30 да якунланган.

Ҳодиса ҳақидаги дастлабки хабарларда беш киши ҳалок бўлгани айтилган. Бироқ бугун, 9 ноябрь куни эрталаб қурбонлар сони 14 нафарга етгани маълум бўлган. “Синьхуа” агентлигининг хабар беришича, жами 38 киши шифохоналарга олиб борилган. Уларнинг бир қисми олган жароҳатлари оқибатида вафот этган.

Ёнғин содир бўлган жойда тегишли хизматлар ҳодиса оқибатларини бартараф этиш ишларини олиб борган. Қидирув-қутқарув ишлари якунланган бўлса-да, ёнғин келиб чиқишига нима сабаб бўлгани ҳозирча номаълум. Айни пайтда ҳодиса юзасидан тергов ҳаракатлари олиб борилмоқда.

Эслатиб ўтамиз, аввалроқ Канаданинг Альберта провинциясидаги Wainwright ҳарбий базасида кучли шамол сабаб ўт-ўлан ёнғини тез тарқалиб, 4 нафар ҳарбий ҳалок бўлган эди.