Қозоғистондаги даҳшатли автоҳалокатда 12 киши ҳалок бўлди (видео)

Бугун, 23 октябрь куни Қозоғистоннинг Ақтўбе вилоятида DAF русумли юк машинаси ва йўловчи ташувчи Газель автомобили тўқнашиши оқибатида 12 киши ҳалок бўлди. Бу ҳақда вилоят Ички ишлар бошқармасига таяниб, “Nur.kz” хабар берди.

Қайд этилишича, Самара-Шимкент автомобиль йўлида, Белқопа қишлоғи яқинида DAF юк машинаси ва йўловчи Газель иштирокида ЙТҲ содир бўлган. Дастлабки маълумотларга кўра, юк машинаси қарама-қарши йўлга чиқиб кетган.

“ЙТҲ оқибатида воқеа жойида ҳар иккала ҳайдовчи ҳамда Газелдаги 10 йўловчи ҳалок бўлди, яна 5 киши тиббиёт муассасасига етказилди. Ҳодиса юзасидан терговга қадар текширув бошланган. Аниқланишича, Газель Жургенов номли қишлоқдан вилоят марказига йўловчи ташиш фаолияти билан шуғулланган”, дейилади хабарда.

Ҳозирда воқеа жойида полиция ходимлари ва тергов гуруҳи ишламоқда, барча тафсилотлар ўрганилмоқда.

Эслатиб ўтамиз, аввалроқ Угандадаги Кампала-Гулу автомагистралида содир бўлган йирик йўл-транспорт ҳодисаси оқибатида 63 киши ҳалок бўлганди ва бир неча киши жароҳат олган эди.