Франция пойтахтидаги 411 йиллик тарихий бозор бутунлай ёниб кетди

Франция пойтахти Парижда 1615 йилда ташкил этилган тарихий озиқ-овқат бозори кучли ёнғин оқибатида бутунлай вайрон бўлди. Бу ҳақда “Le Parisien” нашри хабар берди.

Қайд этилишича, ёнғин жорий йилнинг 11 октябридан 12 октябрига ўтар кечаси Парижнинг III округида жойлашган Марче дес Энфантс-Роугес ёпиқ бозорида содир бўлган. Ёнғин ҳақидаги хабар маҳаллий вақт билан тахминан соат 03:00 да келиб тушган. Ҳодиса жойига кўплаб ўт ўчирувчилар ва махсус техникалар жалб этилган.

Париж ўт ўчириш хизмати вакили маълум қилишича, улар етиб борганида бозорнинг ичида олов кучайиб, баланд аланга бутун бинога тарқалган. Ёнғин тахминан 1 минг квадрат метр майдонни қамраб олган. Бозорнинг ёпиқ қисми ва унинг металл конструкциялари бутунлай ёниб кетган. Шунингдек, бинонинг айрим қисмлари қулаб тушиши хавфи юзага келган.

Париж маркази мэри Ариэль Вейлнинг билдиришича, ўт ўчирувчилар оловнинг атрофдаги уйлар ва савдо нуқталарига тарқалишининг олдини олган. Дастлабки маълумотларга кўра, ёнғин қўшни биноларга зарар етказмаган.

Маълум қилинишича, ёнғин оқибатида бозорда фаолият юритган 20 га яқин савдогар жиддий зарар кўрган. Уларнинг айримлари бу ерда бир неча авлоддан бери савдо қилиб келган. Париж мэри Эммануэль Грегуар жабрланган савдогарлар ва атрофдаги аҳолига ёрдам кўрсатилишини, тадбиркорлар фаолиятини давом эттириши учун вақтинчалик жойлар ажратилишини билдирган.

Ҳозирда ёнғин сабабларини аниқлаш мақсадида тергов бошланган. Бозор маъмурияти вакиллари ҳозирча ёнғин тасодифан келиб чиққанми ёки қасддан содир этилганми, бу ҳақда аниқ маълумот йўқлигини айтган.

Маълумот учун, Марче дес Энфантс-Роугес Париждаги ҳозиргача фаолият юритиб келган энг қадимги ёпиқ бозор ҳисобланади. Унинг номи XVI асрда яқин атрофда ташкил этилган етимхонадаги қизил кийим кийган болалар билан боғлиқ. Бозор 1982 йилда тарихий ёдгорлик мақомини олган.

Эслатиб ўтамиз, аввалроқ Францияда хакерлар бир неча юзта супермаркетдаги музлаткичларнинг ҳароратини масофадан туриб 50 даражагача кўтаргани ҳақида хабар берилган эди.