“Эвертон” клуби сотувга қўйилди

Англиянинг “Эвертон” клуби эгаси – The Friedkin Group (TFG) жамоани сотиш бўйича таклифларни кўриб чиқишга тайёрлигини маълум қилди. Бу ҳақда клуб матбуот хизмати хабар берди.

“TFG “Эвертон” бошқарувини ўз қўлига олганида, клуб майдонда ҳам, ундан ташқарида ҳам жиддий молиявий ноаниқлик ва қийинчиликларга дуч келаётган эди. Бизнинг биринчи устувор вазифамиз клуб келажагини таъминлаш учун зарур бўлган барқарорлик, инвестиция ва қўллаб-қувватлашни йўлга қўйиш, шунингдек, содиқ мухлисларга узоқ вақтдан бери ваъда қилинган стадион қурилишига кўмаклашишдан иборат эди. Энди бу асослар мустаҳкамланганидан сўнг, “Эвертон” тараққиётининг кейинги босқичини кўриб чиқиш вақти келди. Биз фақат клубни олдинга олиб чиқиш ва унинг муваффақиятларини мустаҳкамлашга қодир деб ҳисоблаган томонларнинг таклифларини кўриб чиқамиз”, дейилади компания баёнотида.

Маълумот учун, TFG 2024 йилда “Эвертон”ни сотиб олган эди. Ўтган мавсумда жамоа Англия Премьер-лигасида 13-ўринни эгаллади. Жорий мавсумда эса бешта учрашувдан кейин тўплаган тўққиз очкоси билан турнир жадвалининг еттинчи поғонасидан жой олган.