Чеферин FIFA президенти лавозими учун номзодини қўймаслигини маълум қилди

Европа футбол иттифоқи (UEFA) президенти Александр Чеферин FIFA президенти лавозими учун ўз номзодини қўймаслигини маълум қилди. Бу ҳақда Чеферин “The Rest is Politics” подкастига берган интервьюсида айтди.

FIFA президенти сайлови 2027 йил март ойида Марокаш пойтахти Работ шаҳрида бўлиб ўтади. Ҳозирда ушбу лавозимни Жанни Инфантино эгаллаб турибди.

“Мен FIFA президенти лавозимига қизиқмайман. Мен UEFA’ни ва бу ерда амалга ошираётган ишларимни яхши кўраман. Иккинчидан, агар мен бу лавозимга қизиққанимда, обрў-эътиборим ва ишончим анча юқори бўлар эди”, дейди Чеферин.

Номзодини қўймаслигини маълум қилган Чеферин Инфантинонинг келажаги ҳақида ҳам фикр билдирди. Унинг сўзларига кўра, амалдаги FIFA президенти икки вариантдан бирини танлаши керак: қўллаб-қувватлов етишмаётганини тан олиб, сайловда иштирок этмаслик ёки муносиб рақиб билан курашиш.

“Менимча у иккинчи вариантни танлайди – у март ойида бўлиб ўтадиган сайловда иштирок этади. Аммо бу ҳолатда, менимча, унга қарши номзод пайдо бўлади. Ҳозирча унинг кимлигини аниқ билмайман”, дейди Чеферин.

58 ёшли Александр Чеферин 2016 йил сентябридан буён UEFA президенти лавозимида ишлаб келмоқда. У икки марта ушбу лавозимга қайта сайланган. Чеферин шунингдек, FIFA вице-президенти ҳам ҳисобланади.

Эслатиб ўтамиз, аввалроқ UEFA ва унинг барча 55 аъзо миллий федерацияси FIFA ҳомийлигидаги мусобақаларни бойкот қилиш эҳтимолини билдирган эди.