“Биз аста-секин ютқазяпмиз”. Федоров Киевни танқид қилди

Украинанинг собиқ мудофаа вазири Михаил Федоров мамлакатнинг Россияга қарши уруш олиб бориш ёндашувини танқид қилди. Унинг айтишича, Украина ҳукуматида урушда қандай ғалаба қозониш бўйича ягона қараш мавжуд эмас. Бу ҳақда Федоров “Reuters” агентлигига берган интервьюсида маълум қилди.

Федоровнинг фикрича, чуқур илдиз отган коррупция ва ҳомийлик тармоқлари, шунингдек, давлат муассасаларида сиёсий мустақилликнинг йўқлиги ҳам мамлакатни орқага тортмоқда.

“Менимча, ҳозир бизнинг урушдаги кейинги йўналишимизни белгилайдиган бурилиш нуқтаси юзага келмоқда. Аммо биз аста-секин ютқазяпмиз”, деган Федоров.

Украинанинг собиқ мудофаа вазири мамлакатни инновацияларни секин жорий этаётгани ва коррупция мавжудлиги учун ҳам танқид қилган. Унинг сўзларига кўра, Украина урушдаги вазиятни ўзгартириш учун сунъий интеллект бошқарувидаги дронлар, арзон ракета тутқичлари ва баллистик ракеталарни ишлаб чиқишга эътибор қаратиши керак.

Федоровнинг айтишича, украиналик ишлаб чиқарувчилар аллақачон ушбу технологиялар устида ишламоқда. Бироқ уларнинг имкониятларидан максимал даражада фойдаланиш учун мамлакатга ягона стратегия керак.

“Россияликларни тўлиқ тўхтата оладиган технологиялар аллақачон мавжуд. Аммо бизда аниқ қараш йўқлиги сабабли улардан фойдаланмаяпмиз”, деган у.

Федоров, шунингдек, Украина давлатининг самарадорлиги пастлигини таъкидлаган. Унинг фикрича, давлат тизими бор-йўғи “5 фоиз қувват билан” ишламоқда.

Зеленский идораси Федоровнинг баёнотларига муносабат билдириб, у яқиндагина мудофаа вазири лавозимида ишлаб турган пайтида урушнинг Украина учун боришини ижобий баҳолаганини айтган.

Маълумот учун, Михаил Федоров Владимир Зеленский жамоасининг собиқ аъзоси. У Зеленский ҳукуматида рақамли трансформация вазири ва мудофаа вазири лавозимларида ишлаган.

Эслатиб ўтамиз, Федоров Мудофаа вазири лавозимидан 2026 йил июль ойида, атиги ярим йил ишлаганидан сўнг бўшатилганди.

Украина Президенти Федоровга ҳукуматдаги бошқа лавозимларни таклиф қилган. Аммо у фақат мудофаа вазири лавозимига қайтишга рози бўлишини билдирган.

Федоровнинг ишдан олиниши атрофидаги можаро давомида унинг сиёсий таъсири ҳам кучайган. У Украинада бўлиб ўтиши мумкин бўлган президентлик сайловлари бўйича ёпиқ сўровлардан бирида учинчи ўринни эгаллаган. Шундан кўп ўтмай, Федоров уруш тугашини кутмасдан Украинада сайловлар ўтказишга чақирган. Зеленский идораси эса бу таклиф “реализмнинг тўлиқ йўқлигини” кўрсатишини билдирган.