АҚШ разведкаси раҳбари яширинча Москвага борди

АҚШ Марказий разведка бошқармаси (CIA) директори Жон Рэтклифф Россия пойтахти Москвага эълон қилинмаган музокаралар учун борди. Бу ҳақда BBC’нинг АҚШдаги ҳамкори CBS хабар берди.

Рэтклифф кеча, 25 август куни Москвага етиб боргани айтилмоқда. АҚШ ва Россия расмийлари ташрифнинг мақсади ёки у ким билан учрашгани ҳақида маълумот бермаган.

Парвозларни кузатиш маълумотларига кўра, АҚШ ҳарбийларига тегишли C-17 русумли йирик транспорт самолёти 25 август куни Латвия орқали Москвага учган. Самолёт Москвадаги Внуково аэропортига тахминан 07:04 GMT да қўнган ва 17:00 GMT атрофида Ригага қайтиб келган.

Ижтимоий тармоқларда Москва кўчаларида дипломатик кортеж ҳаракатлангани акс этган видеолар ҳам тарқалган. АҚШ томони Украинага Москвага юқори мартабали делегация бориши ҳақида маълум қилган ва делегация Россиядан чиқиб кетгунча Киевдан зарбаларни тўхтатиб туришни сўраган, деб хабар берган CBS’га украиналик юқори лавозимли амалдор.

Бу Рэтклиффнинг CIA директори сифатида Россияга биринчи ташрифи бўлиши мумкин. Буюк Британиянинг 2019-2022 йилларда Москвадаги ҳарбий атташеси бўлган Жон Форман ташриф эскалацияни бошқариш масалаларига қаратилган бўлиши мумкинлигини айтган.

Унинг таъкидлашича, АҚШ одатда юқори мартабали амалдорни қисқа вақт ичида ва олдиндан эълон қилмасдан Москвага юбормайди. Форман музокараларда Россияда сақланаётган АҚШ фуқароларини озод қилиш масаласи ҳам кўтарилиши мумкинлигини истисно қилмаган.

Қайд этилишича, Рэтклифф Россияда қамалган Россия-Америка фуқароси Ксения Карелинани озод қилиш бўйича музокараларда иштирок этган. CIA 2024 йилда Россия ва АҚШ ўртасидаги маҳбуслар алмашинувида ҳам иштирок этган. Ўша келишув доирасида “The Wall Street Journal” мухбири Эван Гершкович ва собиқ америкалик денгиз пиёдаси Пол Уилан озод қилинган.

Маълумот учун, АҚШ ва Россия муносабатлари Москва 2022 йилда Украинага кенг кўламли босқин бошлаганидан бери кескинлашган. Президент Дональд Трампнинг Россия Президенти Владимир Путин билан Аляскадаги учрашуви ҳамда кейинги тинчлик музокаралари ҳозирча сезиларли натижа бермаган.

Эслатиб ўтамиз, 2025 йилнинг 15 август санасида АҚШ Президенти Дональд Трамп ва Владимир Путин Аляскада учрашув ўтказишганди.