Москвадаги аэропорт ҳожатхонасидан аёл ва чақалоқнинг жасади топилди

Кеча, 2 октябрь куни Москвадаги Шереметьево аэропортининг учиб келиш зонасидаги ҳожатхонадан аёл киши ва янги туғилган чақалоқнинг мурдаси топилди. Ҳолат юзасидан жиноят иши қўзғатилди. Бу ҳақда Москва вилояти бўйича Тергов бошқармасига таяниб, “Meduza” хабар берди.  

Ҳуқуқни муҳофаза қилиш органларининг ТАССга маълум қилишича, дастлабки тахминларга кўра, 30 ёшли аёл аэропорт ҳожатхонасида фарзанд дунёга келтирган ва сўнг уни бўғиб ўлдирган.

Куч ишлатар тузилмаларга яқин бўлган “Mash”, “Baza” ва “112” Telegram-каналлари маълумотига кўра, аёл Туркиядан учиб келган. Аэропортда унда тўлғоқ бошланган, у ҳожатхона кабиналаридан бирига беркиниб олиб, болани туғган ва оғзига ҳожатхона қоғозини солиб, уни бўғиб ўлдирган.

Унинг чинқириқларини эшитган ва қонни кўрган одамлар унга ёрдам беришга ҳаракат қилган, аммо у ёрдамни рад этган. Аёлга ёрдам бериш учун тиббиёт ходимлари чақирилган, лекин у кўп қон йўқотишдан вафот этган.

“Mash” нашрининг ёзишича, марҳума асли украиналик бўлиб, ўзини ўзи мустақил деб эълон қилган ЛХРда рўйхатда турган. У Туркиядан эри ва 11 ёшли қизи билан учиб келган. Эри аёлининг ҳомиладорлигидан бехабар бўлганини айтган.

Эслатиб ўтамиз, аввалроқ Буюк Британиянинг Шеффилд шаҳрида янги туғилган қизалоқ 15 марта пичоқланиб, жами 33 та жароҳат билан ўлик ҳолда топилгани ҳақида хабар берилаган эди.