Сурхондарёда аёл янги туғилган чақалоғини ҳожатхонага ташлаб юборди

Сурхондарё вилоятининг Қумқўрғон туманида янги туғилган чақалоғини ҳожатхонага ташлаб юборган аёл 3 йилга озодликни чеклаш жазосига ҳукм қилинди. QALAMPIR.UZ суд ҳужжати билан танишди.

Суд ҳужжатига кўра, 1993 йилда туғилган Д.Э. 2024 йилнинг ноябрь ойида Шўрчи туманида яшовчи А.Ў. билан шаръий никоҳ асосида турмуш қурган. Уларнинг 2025 йил 25 апрелда бир нафар қиз фарзанди туғилган. Д.Э. ўша йил сентябрь ойида иккинчи фарзандига ҳомиладор бўлган.

Аёл жорий йилнинг 8 июнь куни аёл Шўрчи туманидаги яшаш уйидан Қумқўрғон туманида яшовчи ота-онасиникига келган. 10 июнь куни соат 05:00 ларда у уйнинг орқа томонидаги ҳожатхонада қиз фарзандини дунёга келтирган ва чақалоқни ҳожатхона ичига ташлаб юборган.

Судда Д.Э. чақалоқ ўлик туғилган деб ўйлаганини айтган. Бироқ суд-тиббий экспертизаси хулосасида чақалоқнинг ўлимига нафас йўлларининг нажас билан беркилиши оқибатида юзага келган механик асфиксия сабаб бўлгани кўрсатилган.

Суд мажлисида аёл ўз айбига иқрор бўлиб, қилган ишидан пушаймонлигини билдирган. У қарамоғида бир нафар фарзанди борлиги ва ҳомиладор эканини айтиб, енгиллик сўраган. Чақалоқнинг отаси ҳам аёлга нисбатан даъвоси йўқлигини билдириб, суддан унга енгиллик беришни сўраган.

Суд Д.Э. нинг айбига иқрорлиги, пушаймонлиги, илгари судланмагани, вояга етмаган фарзанди борлиги ва ҳомиладорлигини жазони енгиллаштирувчи ҳолатлар сифатида баҳолаган. Жиноятни ғараз ва паст ниятларда содир этганини эса жазони оғирлаштирувчи ҳолат деб топган.

Суд ҳукмига кўра, Д.Э. Жиноят кодексининг 99-моддаси (Онанинг ўз чақалоғини қасддан ўлдириши) билан айбли деб топилиб, 3 йил муддатга озодликни чеклаш жазосига ҳукм қилинган. Унга яшаш жойини назорат қилувчи органнинг розилигисиз ўзгартирмаслик, Сурхондарё вилоятидан чиқмаслик, шунингдек, кафе, бар, ресторан ва оммавий тадбирларга бормаслик каби чекловлар белгиланган.

Эслатиб ўтамиз, аввалроқ Навоий вилоятининг Хатирчи туманида йиғлагани учун отаси оғзига пайпоқ тиқиб қўйган 5 ойлик чақалоқ вафот этгани ҳақида хабар берилган эди.