“Ҳаммаси нолга тенг”. Алишер Қодиров яна Ўзбекистон МТЖни танқид қилди

Ўзбекистон миллий терма жамоасининг Жаҳон чемпионатидаги иштироки, мураббий иши, жамоа руҳи, миллиардларга олиб келинган мураббийнинг иши нолга тенг, дея баҳоланди. Бундай фикрни Олий Мажлис Қонунчилик палатасидаги “Миллий тикланиш” демократик партияси раиси Алишер Қодиров ўзининг Telegram-каналида ёзди.

Қодиров Ўзбекистон миллий терма жамоасининг Жаҳон чемпионатидаги муваффақиятсизлигидан сўнг яна футболчилар, мураббийлар ва тизимни кескин танқид қилган.

“0 – мураббий иши, дарвозабон, жамоа руҳи, жамғарилган очко, миллиардлаб харажатга сотиб олинган қиймат ва келажакка умид… ”, дея ёзади Қодиров.

Шунингдек, депутат бутун бошли тизимни ва халқни япон халқи билан солиштириб, 100 йилда ҳам уларга етиб бўлмаслигини қайд этган.

“Биз 1-синфида ҳижжалаб ҳарф тераётган мактабни 8-синфида ўқиётган японлардек ўйламасак бу мактабни 100 йилда ҳам битиролмаймиз…”, дейди Алишер Қодиров.

Қайд этиш жоиз, Ўзбекистон терма жамоаси 2026 йилги Жаҳон чемпионати “К” гуруҳида Колумбияга, (3:1) Португалияга (5:0) ва Конго Демократик Республикасига (3:1) мағлуб бўлиб, мундиални 0 очко билан якунлади.

Эслатиб ўтамиз, аввалроқ Алишер Қодиров терма жамоадаги “хизмат кўрсатган” футболчилар билан хайрлашиб, шу Жаҳон чемпионатининг ўзидаёқ кейинги саралаш даврида фойда берадиган футболчиларга имконият бериш кераклигини айтиб чиққанди.