Zidan faoliyatini Fransiya klubida davom ettirishi mumkin

Fransiyalik mutaxassis Zinedin Zidan murabbiylik faoliyatini Liga 1 da davom ettirishi mumkin. Bu haqda “Transfer News Live” xabar berdi.

Manbaga ko‘ra, PSJ rahbariyati Zidan nomzodiga qiziqish bildirmoqda. Parijliklar ispaniyalik murabbiy Luis Enrike jamoani Yevropa Chempionlar ligasi pley-off bosqichiga olib chiqa olmasa, uni iste’foga chiqarish imkoniyatini ko‘rib chiqmoqchi.

Qayd etish joiz, 52 yoshli Zinedin Zidan 2016-2018 va 2019-2021 yillarda Madridning “Real” klubini boshqargan. Fransiyalik murabbiy “qaymoqranglilar” bilan birgalikda ikki karra Ispaniya chempioni, ikki karra Ispaniya Superkubogi va uch karra Yevropa Chempionlar ligasi g‘olibi bo‘lgan.

Ma’lumot uchun, hozirda PSJ Fransiya chempionatida 12 turdan keyin 32 ochko bilan peshqadamlik qilmoqda, biroq jamoaning YeCHLda ishlari yurishmayapti. 5 ta turdan keyin parijliklar YeCHLda 4 ochko bilan 25-o‘rinni band etgan, bu o‘rin esa klubga musobaqaning pley-off yo‘llanmasini taqdim etmaydi.