JSST sulh boshlanganidan beri ilk bor G‘azodan bemorlarni evakuatsiya qildi

Jahon sog‘liqni saqlash tashkiloti (JSST) sulh boshlanganidan beri birinchi marta G‘azo sektoridan 41 nafar og‘ir ahvoldagi bemor va ularning 145 nafar hamrohini evakuatsiya qildi. Bu haqda tashkilot Bosh direktori Tedros Adxanom Gebreyesus X ijtimoiy tarmog‘idagi sahifasida ma’lum qildi.

“JSST sulh boshlanganidan beri birinchi marta G‘azo sektoridan 41 nafar og‘ir ahvoldagi bemor va 145 nafar hamroh shaxsni evakuatsiya qildi”, deb yozdi u.

Gebreyesusning so‘zlariga ko‘ra, taxminan 15 ming bemor hanuzgacha G‘azo sektori tashqarisida tibbiy yordam olish uchun ruxsat kutmoqda. U mamlakatlarni birdamlik ko‘rsatishga va tibbiy evakuatsiyani tezlashtirish uchun barcha yo‘llarni ochishga chaqirgan.

Eslatib o‘tamiz, joriy yilning 9 oktyabr kuni AQSH Prezidenti Donald Tramp Isroil va Falastinning HAMAS harakati G‘azo sektoridagi ikki yillik qurolli mojaroni hal etish bo‘yicha tinchlik rejasining birinchi bosqichini amalga oshirish to‘g‘risida kelishuvga erishganini e’lon qilgandi.

Tramp tomonidan 29 sentyabr kuni taqdim etilgan reja 20 banddan iborat bo‘lib, 72 soat ichida garovga olinganlarni ozod etish sharti bilan zudlik bilan o‘t ochishni to‘xtatishni nazarda tutadi. Hujjatga ko‘ra, HAMAS va boshqa falastinlik guruhlar G‘azo sektorini boshqarishda ishtirok etmaydi, nazorat xalqaro nazorat ostidagi texnokratik hukumatga o‘tadi, bu jarayonga Trampning o‘zi rahbarlik qiladi.

Kelishuv doirasida HAMAS 2023 yil 7 oktyabrdan beri G‘azoda ushlab turilgan 20 nafar garovdagilarni ozod qildi, shunday qilib, tirik qolgan barcha garovdagilar ozod etildi. Falastinning mahbuslar ishlari bo‘yicha matbuot xizmati ma’lumotiga ko‘ra, Isroil kelishuvga binoan G‘azo sektoridan 1718 mahbusni ozod qilgan va ular yarim eksklavga qaytgan. Shuningdek, umrbod yoki uzoq muddatli jazo o‘tayotgan 250 nafar falastinlik mahbus ham ozod etilgan. Ularning bir qismi Falastinning boshqa hududlariga yuborilgan, bir qismi esa deportatsiya qilingan.