Jizzaxda 7 qavatli “dom”da yong‘in sodir bo‘ldi

Jizzax shahrida joylashgan 7 qavatli binoning yuqori qavatida yong‘in sodir bo‘ldi. Bu haqda Jizzax viloyati Favqulodda vaziyatlar boshqarmasi Matbuot xizmati xabar berdi.

Xabarga ko‘ra, bugun, 14 iyun kuni soat 05:00 da Jizzax shahar “Xalqabod” MFY R.Isayev ko‘chasida joylashgan 7 qavatli binoda yong‘in yuzaga kelgan. Yong‘in-qutqaruv ekipajlari soat 05:08 da voqea joyiga yetib borib, yong‘in soat 05:15 da o‘rab olingan va soat 06:00 da o‘chirilgan.

“Dastlabki ma’lumotlarga ko‘ra, binoning 180 metr kvadrat maydoni yonib zararlangan, 400 metr kvadrat maydoni yong‘indan saqlab qolingan. Yong‘in oqibatida tan jarohati olgan va halok bo‘lganlar yo‘q. Hozirda yong‘in sababi va moddiy zarar miqdori aniqlanmoqda”, deyiladi xabarda.

Eslatib o‘tamiz, bugun soat 12:40 da Sirdaryo viloyati Guliston shahridagi avtobekatda yong‘in chiqqan edi. Shuningdek, bugun ertalab soat 09:50 da Toshkent shahar Chilonzor tumani Astrobod ko‘chasida joylashgan mis quvurlari ishlab chiqarish sexida portlash sodir bo‘lgandi.