Jizzaxda 30 ga yaqin xonadonni suv bosdi (video)

Bugun, 14 fevral kuni Jizzax viloyatining Forish tumanidagi ko‘plab xonadonlarni suv bosdi. Bu haqda Favqulodda vaziyatlar vazirligi xabar berdi.

Ma’lum qilinishicha, soat 04:53 da Forish tumanida kuzatilgan qisqa muddatli kuchli yomg‘ir yog‘ishi oqibatida “Qizilqum” MFY Qizilqum qishlog‘idan sel-suvlari oqimlari oqib o‘tishi kuzatilgan.

Dastlabki ma’lumotlarga ko‘ra, Qizilqum qishlog‘ining Erali ko‘chasidagi taxminan 30 ga yaqin aholi xonadonlarning hovlisi va tomorqalariga sel-suvlari kirishi kuzatilgan.

Vaziyat oqibatlarini bartaraf etishga barcha zarur texnika va kuch-vositalar jalb etilgan. Hodisa oqibatida vafot etgan va jarohat olganlar yo‘q.

Qo‘shimcha qilinishicha, vaziyat viloyat FVB tomonidan to‘liq nazoratga olingan.

Shuningdek, kecha, 13 fevral kuni 22:05 da tumanning Yangiqishloq shaharchasidan o‘tgan avtomobil yo‘liga yashin ham tushgan. Bu voqeada ham hech qanday talofat kuzatilmagan.

O‘zgidrometga ko‘ra, kecha, 13 fevral kuni Forish tumanining Yangiqishloq meteostansiyasida soat 21:04 dan 21:07 gacha diametri 0,7 mm bo‘lgan do‘l yog‘ib o‘tgan.

Eslatib o‘tamiz, avvalroq Jizzax viloyatining Sharof Rashidov tumaniga sel kelgandi.