Jastin Getjining ehtimoliy raqibi ma’lum qilindi

Yengil vazn toifasi sobiq vaqtinchalik UFC chempioni Jastin Getji navbatdagi jangini Den Xukerga qarshi o‘tkazishi mumkin. Bu xaqda “MMA Orbit” nashri xabar berdi.

Manbaga ko‘ra, amerikalik sportchining keyingi jangi katta ehtimol bilan 9 mart kuni Las-Vegasda tashkil etiladigan UFC 313 turniri doirasida Yangi Zelandiya vakili Den Xukerga qarshi bo‘ladi. Getji ham navbatdagi jangi haqida munosabat bildirdi.

“Hali tasdiqlanmadi, ammo katta ehtimol bilan Xuker mening keyingi raqibim bo‘ladi. Promoushen rahbarlari bu borada muzokaralarni boshlab yuborgan. Chunki, ikki-uch oy oldin UFC'ga mart oyida oktagonga ko‘tarilmoqchiligimni ma’lum qilgan edim. Ayni damga kelib, turnir kardi rejalashtirilmoqda. Men esa bu turnirga ham jismoniy, ham ruhiy tayyorgarlik ko‘raman. Men oktagonga qaytyapman, ammo raqib o‘zgarib qolishi mumkin. Axir bu-UFC”, deydi Getji.

Ma’lumot o‘rnida, 37 yoshli amerikalik jangchi oxirgi jangini 2024 yilning 13 aprelida UFC 300 turniri doirasida Maks Xolloueyga qarshi o‘tkazgan va jang tugashiga 1 sekund qolganida nokautga uchragan. Xuker esa so‘nggi jangida Mateush Gamrotni ochkolar hisobiga ko‘ra mag‘lub etgandi.