Janubiy Koreyada o‘rmon yong‘iniga sababchi shaxs qo‘lga olindi

Janubiy Koreyada politsiya mamlakat janubi-sharqida keng ko‘lamli o‘rmon yong‘inlariga sabab bo‘lgan, o‘rmonga o‘t qo‘yishda gumon qilingan 56 yoshli erkakni qo‘lga oldi. Bu haqda “Yonhap” xabar berdi.

Ma’lum qilinishicha, qo‘lga olingan shaxs 22 mart kuni soat 11:25 atrofida Shimoliy Kyonsan provinsiyasi Uison okrugidagi tepalikda joylashgan oilaviy qabrda ajdodlarni xotirlash marosimini o‘tkazayotganda yong‘in sodir etganlikda ayblanmoqda. Shiddatli shamol va quruq ob-havo tufayli yong‘in tezda yaqin atrofdagi Andon, Chxonson, Yon’yan va Yondokka tarqalgan, 27 kishi halok bo‘lgan.

O‘rmon yong‘inlari 4000 ga yaqin binolarni, jumladan, UNESCO'ning Butunjahon merosi ro‘yxatiga kiritilgan Goun ibodatxonasini, shuningdek, turarjoy binolari, fabrikalar va boshqa ob’ektlarni vayron qilgan. 20 mingdan ortiq aholi o‘z hududlaridan ko‘chib ketishga majbur bo‘lgan. Tabiiy ofatga qarshi kurashga 5 mingga yaqin harbiy xizmatchi va 146 ta vertolyot jalb qilingan.

Politsiya ma’lumotlariga ko‘ra, gumonlanuvchi o‘z aybini tan olmagan.

Eslatib o‘tamiz, avvalroq Janubiy Koreyaning janubi-sharqiy mintaqasida davom etayotgan o‘rmon yong‘inlarida halok bo‘lganlar soni 24 kishiga yetgani haqida xabar berilgandi.