Zelenskiy Ukraina Qurolli kuchlari Bosh shtabi rahbariyatini almashtirdi

Ukraina Prezidenti Vladimir Zelenskiy Ukraina Qurolli kuchlari Bosh shtabi boshlig‘i Sergey Shaptalani ishdan bo‘shatdi. Uning o‘rniga avvalroq mamlakat qurolli kuchlarining hududiy mudofaa kuchlariga rahbarlik qilgan general-mayor Anatoliy Bargilevich tayinlandi. Bu haqda Zelenskiy videomurojaatida ma’lum qildi.

Zelenskiy Bargilevichni ushbu urushning vazifalari va Ukraina maqsadlarini tushunadigan tajribali odam deb ta’rifladi.

Uning aniqlik kiritishicha, u tayinlovni yaqinda Ukraina Qurolli kuchlari bosh qo‘mondoni lavozimiga tayinlangan Aleksandr Sirskiy taklifi bilan amalga oshirgan.

Bundan tashqari, Ukraina Prezidenti Sirskiy o‘z o‘rinbosarlarini allaqachon tanlaganini qo‘shimcha qildi. U ularning ismlarini aytmadi, lekin barcha yigitlar jangovar, professional. 

“Ularning har biri front va ukrainalik askarlarning haqiqiy ehtiyojlarini aniq biladi", deb qo‘shimcha qildi u.

Anatoliy Bargilevich – Ukraina Qurolli kuchlarining 54 yoshli generali, Jitomir viloyatida tug‘ilgan. 2014 yilda Ukraina sharqida urush boshlanganidan beri u mamlakat Bosh shtabining Bosh operatsiyalar boshqarmasida ishlagan, keyin esa Terrorga qarshi operatsiya (ATO) shtab-kvartirasida lavozimni egallagan.

2017 yilda Bargilevichga general-mayor unvoni berildi. Rossiyaning Ukrainaga qarshi urushi boshlanishidan oldin u Ukraina quruqlikdagi qo‘shinlari qo‘mondoni o‘rinbosari lavozimida ishlagan.

2022 yilda u “Xortitsa” qo‘shinlari guruhining shtab boshlig‘i etib tayinlandi, 2023 yil oktyabr oyida u Ukraina Qurolli kuchlari hududiy mudofaa kuchlari qo‘mondoni lavozimini egalladi.

Eslatib o‘tamiz, avvalroq Ukraina Prezidenti Vladimir Zelenskiy Ukraina Qurolli kuchlari bosh qo‘mondoni Valeriy Zalujniyni lavozimidan ozod qilib, uning o‘rniga sharqiy frontdagi Ukraina qo‘shinlari guruhi qo‘mondoni, general-polkovnik Aleksandr Sirskiyni tayinlagandi.