Zelenskiy Trampni tinchlik rejasini baham ko‘rishga chaqirdi

Ukraina Prezidenti Vladimir Zelenskiy Oq uyning sobiq rahbari Donald Trampni Rossiyaning Ukrainaga qarshi urushini 24 soat ichida tugatish rejasi bilan bo‘lishishga chaqirdi. Bu haqda Zelenskiy kecha, 3 iyul kuni Amerikaning “Bloomberg Television” telekanaliga bergan intervyusida ma’lum qildi.

“Agar Tramp bu urushni qanday tugatishni bilsa, u bizga bugun aytishi kerak. Agar Ukraina mustaqilligi uchun xavf-xatarlar mavjud bo‘lsa, agar biz davlatchilikni yo‘qotsak, bunga tayyor bo‘lishni va buni bilishni xohlaymiz”, degan Ukraina Prezidenti.

Zelenskiy Tramp va uning jamoasi bilan ularning takliflarini tinglash uchun uchrashishga “potensial tayyor” ekanligini aytdi.

“Biz noyabr oyida AQSH tomonidan kuchli yordamga ega bo‘lamizmi yoki butunlay yolg‘iz qolamizmi, shuni tushunishni istaymiz”, deb ta’kidladi Zelenskiy.

Shu bilan birga, Ukraina rahbari yana bir kun oldin Vengriya Bosh vaziri Viktor Orban tomonidan taklif qilingan sulhga qarshi chiqdi. Uning so‘zlariga ko‘ra, ilgari shunga o‘xshash takliflar bilan chiqqanlar bu qanday ishlashi mumkinligini ayta olmagan.

“Hech kimning yechimi yo‘q”, deydi Zelenskiy.

Avvalroq, 2024 yilgi prezidentlik saylovlarida Respublikachilar partiyasidan AQSH prezidentligiga eng ko‘p nomzod bo‘lgan Donald Tramp, agar u g‘alaba qozonsa, lavozimga kirishishdan oldin “24 soat ichida” Rossiya va Ukraina o‘rtasida tinchlik kelishuviga erisha olishini bir necha bor ta’kidlagan edi. Biroq, u buni qanday qilishini ochiqchasiga aytishdan bosh tortdi, ammo Ukraina tinchlik uchun o‘z hududlarining bir qismini yo‘qotishga rozi bo‘lishi kerakligini tan oldi.

Avvalroq “The Washington Post” gazetasi Trampning anneksiya qilingan Qrim va Donbassni Rossiyaga berishi uchun Kiyevga bosim o‘tkazish niyati haqida yozgan edi. “Reuters” xabariga ko‘ra, Rossiyaning Ukrainaga qarshi urushini to‘xtatish bo‘yicha uning maslahatchilari Trampga taqdim etgan rejada Kiyev Rossiya Federatsiyasi bilan tinchlik muzokaralariga kirishgan taqdirdagina Amerika qurollarini olishini ko‘zda tutadi.