Zelenskiy ham shu oyda AQSHga boradi

Ukraina Prezidenti Vladimir Zelenskiy shu oy AQSHning Nyu-York shahriga boradi. Bu haqda kecha, 1 sentyabr kuni Albaniyaning BMTdagi doimiy vakili Farid Xo‘ja ma’lum qildi.

Farid Xo‘janing aytishicha, Zelenskiy BMT Bosh Assambleyasining yuqori darajadagi haftaligida ishtirok etadi va unda nutq so‘zlaydi. Uning AQSHga safari dasturi allaqachon tasdiqlangan. Ukraina rahbari BMT Bosh kotibi Antoniu Guterrish va ko‘plab davlatlar yetakchilari bilan uchrashishi kutilmoqda.

Ma’lumot uchun, sentyabr oyida BMT Xavfsizlik kengashiga raislik qilish AQSHdan Albaniyaga o‘tgan.

Eslatib o‘tamiz, oldinroq Turkiya Prezidenti Rajab Toyib Erdo‘g‘an ham BMT Bosh Assambleyasida qatnashish uchun Nyu-Yorkka borishi aytilgandi. AQSH Prezidenti Jo Bayden esa Markaziy Osiyo davlatlari rahbarlarini, xususan, O‘zbekiston Prezidenti Shavkat Mirziyoyevni BMT Bosh Assambleyasining yuqori darajadagi haftaligi doirasida C5+1 formatidagi uchrashuvga taklif qilgandi.