Yevropada Rossiyaning to‘rtta nashri taqiqqa uchradi

Yevropa Ittifoqi kecha, 17 may kuni Rossiya bilan bog‘liq to‘rtta ommaviy axborot vositalarining YeI bo‘ylab tarqatilishini to‘xtatib qo‘ydi. Bu haqda Yevropa kengashi bayonot berdi.

Hujjatga ko‘ra, taqiq “Yevropa Ovozi”, “RIA Novosti” axborot agentligi, “Izvestiya” va “Rossiyskaya gazeta” gazetalariga Rossiyaning Ukrainaga qarshi bosqinchilik urushini qo‘zg‘atish va qo‘llab-quvvatlashda muhim rol o‘ynaganligi” sababli amal qiladi.

Bu chora Rossiyaning 2022 yilda Ukrainaga keng ko‘lamli bostirib kirishi munosabati bilan rejalashtirilgan 14-sanksiya paketining bir qismidir. Ilgari blok Rossiyaning “Russia Today” va “Sputnik” davlat ommaviy axborot vositalariga qarshi sanksiyalar kiritgan edi.

Yevropa Ittifoqi shu hafta boshida bunday harakatni rejalashtirayotganini bildirgan. Shundan so‘ng Rossiya Tashqi ishlar vazirligining rasmiy vakili Mariya Zaxarova bunday harakatga Moskva yashin tezligida va “g‘arbliklar uchun juda og‘riqli” javob berishini bildirdi. 

Rossiya Jurnalistlar uyushmasi xalqaro bo‘limi boshlig‘i Timur Shofir “Izvestiya” nashriga bergan intervyusida Yevropa Ittifoqi tomonidan kiritilgan taqiqni “qonunsiz” deb atadi va bu masalani sud hal qilishi kerakligini aytdi. Uning so‘zlariga ko‘ra, bu taqiq bir vaqtlar Sovet Ittifoqi nazorati ostida bo‘lgan Yevropaning ayrim hududlaridagi rusiyzabon odamlarning jahon voqealari haqidagi “muqobil ma’lumotlar”ga kirishiga to‘sqinlik qiladi.