“Yevro - 4” va “Yevro - 5” dizel yoqilg‘isi sotuvga chiqarildi

“UNG Petro” korxonasining barcha avtomobillarga yoqilg‘i quyish stansiyalari orqali mahalliy «Yevro – 4» va "Yevro – 5" dizel yoqilg‘isi sotuvga chiqarildi. Bu haqda "O‘zbekneftgaz" AJ Matbuot xizmati xabar berdi.

"O‘zbekneftgaz" AJ tomonidan O‘zbekiston tarixida ilk marta "Yevro - 4" va "Yevro - 5" yuqori sifatli dizel yoqilg‘isi ishlab chiqarishni yo‘lga qo‘yganligi haqida xabar bergan edi.

"Yevro – 4" va "Yevro – 5" yoqilg‘isi dvigatel ishlash jarayonini yaxshilash, yemirilishni kamaytirish, zararli chiqindi gazlar miqdorini keskin kamaytirish va silindrlar ishlash davrini uzaytirish kabi afzalliklarga egadir. Ushbu markadagi dizel yoqilg‘isi bugun, 5 iyundan e’tiboran, "O‘zbekneftgaz" AJga qarashli "UNG Petro" korxonasining Avtomobillarga yoqilg‘i quyish stansiyalari orqali ham sotuvga ham chiqarildi.

Korxona chakana savdo orqali kunlik 60 tonna miqdoridagi "Yevro - 4" va "Yevro - 5" yoqilg‘isini sotishni rejalashtirgan.

Eslatib o‘tamiz, Buxoro neftni qayta ishlash zavodining bosqichma-bosqich modernizatsiya qilinishi natijasida va Fransiyaning "Axens" kompaniyasi mutaxassislari ishtirokida tegishli reaktorga yangi katalitik tizim o‘rnatilgan va 2020 yilning 30 mart kunidan "Yevro - 4" va "Yevro - 5" sinfidagi ekologik toza dizel yoqilg‘isini ishlab chiqarish yo‘lga qo‘yilgan edi.

Avvalroq, AI-80 markali benzin ishlab chiqarishdan butunlay voz kechilishi haqida xabar bergan edik.