Yevro-2028. Ochilish o‘yini va final o‘tadigan stadionlar ma’lum bo‘ldi

Angliya, Shotlandiya, Uels va Irlandiya mezbonlik qiladigan 2028 yilgi Yevropa chempionatining ochilish o‘yini 9 iyun kuni “Kardiff”da bo‘lib o‘tadi, final esa 9 iyul kuni Londondagi “Uembli” stadionida o‘tkaziladi. Bu haqda turnir tashkilotchilari UEFA rasmiy bayonot chiqardi.

Musobaqa sakkizta shaharda joylashgan 9 ta stadionda o‘tkaziladi. Ular orasida Birmingem, Dublin, Glazgo, Liverpul, Manchester, Nyukasl, Kardiff va London bor. Umumiy hisobda 24 mamlakat ishtirok etadigan turnirda 51 ta o‘yin o‘tkazilishi rejalashtirilgan.

Yarim final va bir chorak final uchrashuvlari “Uembli”da bo‘lib o‘tadi. Qolgan chorak final o‘yinlari esa Dublin, Glazgo va Kardiffda o‘tkaziladi. 1/8 final bahslari “Uembli”dan tashqari barcha mezbon stadionlarga taqsimlanadi.

“Yevro-2028 davomida biz bir ovozdan, aniq va birdam futbol haqida gapiramiz. Mezbon davlatlar millionlab muxlislarni afsonaviy stadionlarda kutib olishga tayyor. Biz o‘yinlar jadvalini shunday tuzdikki, muxlislar uchun qulay va unutilmas tajriba yaratiladi”, deydi UEFA prezidenti Aleksandr Cheferin.

Mustaqil tahlillarga ko‘ra, 2028 yilgi chempionat Buyuk Britaniyaga 3,6 milliard funt sterling (taxminan 4,83 milliard dollar) miqdorida ijtimoiy-iqtisodiy foyda keltirishi kutilmoqda. Bu foyda ish o‘rinlari yaratish, mintaqaviy iqtisodiy faollik va xalqaro sayyohlik oqimining ortishi hisobiga shakllanadi.

Buyuk Britaniya, Shotlandiya, Uels va Irlandiya hukumatlari tadbir xavfsizligi va yuqori tashkiliy darajani ta’minlash maqsadida jami 740 million funt sterling (993 million dollar)gacha mablag‘ ajratishga va’da berdi.

Mezbon davlatlar Yevro-2028 saralash bosqichida qatnashadi. Ammo, agar bu jamoalar turnirga chiqa olmasa, ular uchun faqat ikki yo‘llanma saqlanib qoladi.

Ma’lumot uchun, Angliya Germaniyada o‘tgan Yevro-2024 da ikkinchi o‘rinni egallagan bo‘lsa, Shotlandiya guruh bosqichida to‘xtagan edi. Uels va Irlandiya esa o‘sha turnirda ishtirok eta olmagan. Shuningdek, UEFA Belfastni 2026 yil 6 dekabr kuni o‘tkaziladigan Yevro-2028 saralash bosqichi qur’a tashlash marosimi mezboni sifatida tanlagan.