Евро-2028. Очилиш ўйини ва финал ўтадиган стадионлар маълум бўлди

Англия, Шотландия, Уэльс ва Ирландия мезбонлик қиладиган 2028 йилги Европа чемпионатининг очилиш ўйини 9 июнь куни “Кардифф”да бўлиб ўтади, финал эса 9 июль куни Лондондаги “Уэмбли” стадионида ўтказилади. Бу ҳақда турнир ташкилотчилари UEFA расмий баёнот чиқарди.

Мусобақа саккизта шаҳарда жойлашган 9 та стадионда ўтказилади. Улар орасида Бирмингем, Дублин, Глазго, Ливерпуль, Манчестер, Ньюкасл, Кардифф ва Лондон бор. Умумий ҳисобда 24 мамлакат иштирок этадиган турнирда 51 та ўйин ўтказилиши режалаштирилган.

Ярим финал ва бир чорак финал учрашувлари “Уэмбли”да бўлиб ўтади. Қолган чорак финал ўйинлари эса Дублин, Глазго ва Кардиффда ўтказилади. 1/8 финал баҳслари “Уэмбли”дан ташқари барча мезбон стадионларга тақсимланади.

“Евро-2028 давомида биз бир овоздан, аниқ ва бирдам футбол ҳақида гапирамиз. Мезбон давлатлар миллионлаб мухлисларни афсонавий стадионларда кутиб олишга тайёр. Биз ўйинлар жадвалини шундай туздикки, мухлислар учун қулай ва унутилмас тажриба яратилади”, дейди UEFA президенти Александр Чеферин.

Мустақил таҳлилларга кўра, 2028 йилги чемпионат Буюк Британияга 3,6 миллиард фунт стерлинг (тахминан 4,83 миллиард доллар) миқдорида ижтимоий-иқтисодий фойда келтириши кутилмоқда. Бу фойда иш ўринлари яратиш, минтақавий иқтисодий фаоллик ва халқаро сайёҳлик оқимининг ортиши ҳисобига шаклланади.

Буюк Британия, Шотландия, Уэльс ва Ирландия ҳукуматлари тадбир хавфсизлиги ва юқори ташкилий даражани таъминлаш мақсадида жами 740 миллион фунт стерлинг (993 миллион доллар)гача маблағ ажратишга ваъда берди.

Мезбон давлатлар Евро-2028 саралаш босқичида қатнашади. Аммо, агар бу жамоалар турнирга чиқа олмаса, улар учун фақат икки йўлланма сақланиб қолади.

Маълумот учун, Англия Германияда ўтган Евро-2024 да иккинчи ўринни эгаллаган бўлса, Шотландия гуруҳ босқичида тўхтаган эди. Уэльс ва Ирландия эса ўша турнирда иштирок эта олмаган. Шунингдек, UEFA Белфастни 2026 йил 6 декабрь куни ўтказиладиган Евро-2028 саралаш босқичи қуръа ташлаш маросими мезбони сифатида танлаган.