“Yotoqxona mashmashasi” boshlandi. Kimlar imtiyozlilar qatorida?

O‘zbekistonda ayrim toifadagi Oliy ta’lim muassasalari talabalari ustuvorlik asosida yotoqxonaga joylasha oladi. Bu kecha, 14 avgust kuni respublika Vazirlar Mahkamasi tomonidan qabul qilingan “Oliy ta’lim muassasalari talabalarini turar-joy bilan ta’minlash tizimini takomillashtirish chora-tadbirlari to‘g‘risida”gi qarorda nazarda tutilgan.

Qarorga ko‘ra, quyidagilar talabalar turar joylariga birinchilardan bo‘lib qabul qilinadi:

• “Mehribonlik uylari” tarbiyalanuvchilari, yetim va ota-ona qaramog‘idan mahrum bo‘lganlar;
• “Ijtimoiy himoya yagona reyestri”, “Temir daftar” va “Ayollar daftari”ga kiritilgan ijtimoiy himoyaga muhtoj oilalarning farzandlari hamda “Yoshlar daftari”da turadiganlar;
• I va II guruh nogironligi bo‘lganlar;
• bir oiladan bakalavriat bosqichi kunduzgi ta’lim shaklida ikki yoki undan ortiq to‘lov-shartnoma asosida o‘qiyotgan oilalar farzandlari;
• xalqaro fan olimpiadalari, Oliy ta’lim, fan va innovatsiyalar vazirligi tomonidan o‘tkaziladigan respublika fan olimpiadalarining g‘oliblari;
• “Yil talabasi” va “Talabalar teatr studiyalari” ko‘rik-tanlovlarining respublika bosqichi g‘olibi bo‘lganlar;
• oliy ta’lim muassasalari talabalari o‘rtasida o‘tkazilgan “Zakovat” intellektual o‘yinining respublika bosqichida g‘oliblikni qo‘lga kiritganlar;
• talabalar yotoqxonasida kengash raisi, qavat sardori bo‘lgan talabalar imtiyozlilar sirasiga kiradi.

Avvalroq 2023/2024 o‘quv yilida 1-kurs talabalari, 2024/2025 o‘quv yilidan esa barcha kurs talabalari uchun davlat OTM yotoqxonasiga joylashish onlayn amalga oshirilishi haqida xabar bergan edik.