YeIning yangi sanksiyalari qaysi sohalarga “zarba berishi” ma’lum bo‘ldi

Yevropa Ittifoqining Rossiya Federatsiyasiga qarshi sanksiyalarining yangi paketi neft narxini cheklash, axborot texnologiyalari va kiberxavfsizlik bilan bog‘liq bo‘lishi mumkin. Bu haqda kecha, 22 sentyabr kuni “Financial Times” manbalariga tayanib xabar berdi.

Kutilganidek, nashrning qayd etishicha, sanksiyalar to‘plamida Rossiya neftiga narxlar chegaralarini joriy etish qoidalari, cheklovlarga duchor bo‘lgan shaxslarning qo‘shimcha ro‘yxati hamda Rossiyaning axborot texnologiyalari, kiberxavfsizlik va dasturiy ta’minot sohasiga qarshi choralar ko‘riladi.

Gazetaning yozishicha, ketma-ket sakkizinchi sanksiyaning navbatdagi to‘plami Yevrokomissiya rasmiylarining Yevropa Ittifoqiga a’zo davlatlar vakillari bilan uchrashuvlaridan so‘ng rasman ko‘rib chiqish uchun taklif qilinadi.

Yevropa Ittifoqining radikal a’zolari, ya’ni Polsha va Boltiqbo‘yi davlatlari Rossiyaga nisbatan yangi qattiq choralarni talab qilmoqda, deb yozadi gazeta. Xususan, ular ko‘proq Rossiya banklarining SWIFT tizimidan uzilishini istashadi, shuningdek, olmos importini taqiqlashni yoqlaydilar. Ular nafaqat Rossiyaga, balki Belarusga qarshi ham ushbu sanksiyalarni, jumladan IT-sohasida axborot va boshqa xizmatlar mavjudligini cheklashni talab qilmoqda.

Biroq gazeta intervyu bergan yevropalik rasmiylarning ta’kidlashicha, ba’zi “ulug‘vor g‘oyalar” bo‘yicha kelishuvga erishish qiyin bo‘ladi. Blok sanksiyalarni bir ovozdan ma’qullashi kerak.

“Siz qanchalik ko‘p taklif qilsangiz, ba’zi Yevropa Ittifoqi mamlakatlari hal qilib bo‘lmaydigan bo‘lib qolishining sabablari shunchalik ko‘p. Boshqa tomondan, agar sanksiyalar juda kam bo‘lsa, “qirg‘iylar” bu yetarli emasligini aytishadi”, deydi o‘zini oshkor etmagan diplomat gazetaga.

Yana bir diplomatning ta’kidlashicha, YeI Rossiya neftiga narx chegarasini belgilashga e’tibor qaratishi kerak, chunki “zarba berish mumkin bo‘lgan” tovarlar va hududlar ko‘p emas.

Avvalroq Ukrainaning Rossiya tomonidan egallangan Donbass mintaqasi, Xerson va Zaporoje viloyatlarining RFga qo‘shilishi bo‘yicha bir tomonlama referendumlar o‘tkazilishi munosabati bilan rasmiy Moskvaga qarshi yangi sanksiyalar paketi qabul qilinishi haqida xabar bergan edik.