YeI Rossiyaga qarshi sanksiyalarning to‘qqizinchi paketini kelishib oldi

Yevropa Ittifoqi davlatlari Rossiyaning Ukrainaga bostirib kirishi munosabati bilan to‘qqizinchi sanksiyalar paketini kelishib oldi. Bu haqda Ozodlik radiosi/Ozod Yevropa radiosining Yevropa masalalari bo‘yicha muharriri Rikard Yozvyak ma’lum qildi. 

Avvalroq, to‘qqizinchi sanksiyalar paketining cheklovchi choralari Rossiyaga har qanday uchuvchisiz uchish apparatlari va ular uchun motorlaretkazib berishga ta’sir qilishi mumkinligi xabar qilingandi.Bundan tashqari, motorlarni yetkazib berishni taqiqlash, Yevropa Ittifoqi fikriga ko‘ra, ularni Rossiyaga, masalan, Eronga sotishi mumkin bo‘lgan mamlakatlarga ham tegishli bo‘lishi mumkin. 

Yevropa Ittifoqi Rossiyaning tog‘-kon sanoatiga yangi sarmoya kiritilishini taqiqlashi, shuningdek, Rossiyaga harbiy maqsadlarda ishlatilishi mumkin bo‘lgan tovarlar va fuqarolik texnologiyalarini yetkazib berish bo‘yicha eksport nazoratini kuchaytirishi mumkin. 

5 dekabr kuni YeIning Rossiyaga qarshi sakkizinchi sanksiyalar paketi, jumladan,  tankerlar orqali tashiladigan Rossiya neftiga eng yuqori narxni joriy etish kuchga kirdi. Cheklovlar, shuningdek, Yevropa Ittifoqi mamlakatlari uchun shu kundan boshlab Rossiyadan dengiz orqali yetkazib beriladigan neftni sotib olishni to‘liq taqiqlashni ham o‘z ichiga oladi. Taqiq hozircha quvur neftiga taalluqli emas. Rossiya neft va neft mahsulotlari narx chegarasini o‘rnatgan davlatlarga yetkazib berishdan bosh tortishini aytdi. Biroq, hozircha Moskva hech qanday rasmiy qarorni e’lon qilmagan. 

Rossiya 2022 yilning 24 fevralida Ukrainaga keng ko‘lamli harbiy bosqinni boshladi. Bunga javoban YeI allaqachon Moskvaga qarshi sakkizta sanksiya paketini qabul qilgan. Ularning hech biri Rossiya gaziga embargoni o‘z ichiga olmaydi. Shu bilan birga, Rossiya Yevropa Ittifoqining bir qancha mamlakatlariga gaz yetkazib berishni to‘xtatdi, ayrim davlatlarning o‘zlari esa Rossiya gazidan voz kechdi. Shuningdek, Qo‘shma Shtatlar va Yevropa davlatlari muntazam ravishda Rossiya kompaniyalari bilan hamkorlikni taqiqlovchi yoki cheklovchi sanksiyalarni qo‘llab kelmoqda.