Yaponiyaning yangi Bosh vaziri ham Kim Chen In bilan uchrashmoqchi 

Yaponiyaning yangi Bosh vaziri Sigeru Isiba Shimoliy Koreya razvedkasi tomonidan o‘g‘irlab ketilgan Yaponiya fuqarolari muammosini hal qilish uchun KXDR yetakchisi Kim Chen In bilan uchrashishga tayyorligini bildirdi. Bu haqda u o‘g‘irlanganlarning oilalari bilan uchrashuvda ma’lum qildi.

"Ikki davlat rahbarlari katta rasmni ko‘rishlari va bir-birlariga bu masala bo‘yicha o‘z pozitsiyalarini ochiqchasiga bildirishlari juda muhim", dedi Bosh vazir.

Qayd etish joizki, parlamentdagi birinchi asosiy nutqini so‘zlagan Isiba o‘zidan oldingilardan farqli o‘laroq, Kim Chen In bilan uchrashishga tayyorligini tilga olmagandi.

Shimoliy Koreya razvedka xizmatlari tomonidan yaponlarning o‘g‘irlanishi mavzusi rasmiy diplomatik aloqalarni saqlab turmagan ikki davlat o‘rtasidagi munosabatlardagi eng og‘riqli mavzulardan biri hisoblanadi.

2002 yilda Pxenyan birinchi marta 13 nafar yapon fuqarosi o‘g‘irlanganini tan oldi va ulardan 5 nafariga o‘z vataniga qaytishga ruxsat berdi. Qolganlari o‘lgan deb e’lon qilindi, qoldiqlari qarindoshlariga jo‘natildi, ularning haqiqiyligini tasdiqlab bo‘lmadi.

2014 yil may oyida Yaponiya va Shimoliy Koreya hukumatlari yapon fuqarolarining o‘g‘irlanishi bo‘yicha yangi tergov o‘tkazishga kelishib oldi, biroq bu bilan shug‘ullangan komissiya keyinchalik Pxenyan tashabbusi bilan tarqatib yuborildi.

Shimoliy Koreya yetakchisining singlisi Kim Yo Chen 26 mart kuni Pxenyan Tokio bilan har qanday muzokaralarni rad etishini aytdi. Uning ta’kidlashicha, Pxenyan Tokioning o‘g‘irlangan yapon fuqarolari masalasidagi pozitsiyasi sababli Kim Chen In va Yaponiyaning o‘sha paytdagi bosh vaziri Fumio Kisida o‘rtasida uchrashuv o‘tkazishdan manfaatdor emas.

Kim Chen Inning singlisi Yaponiya “yadro va raketa muammolari” kabi iboralar yordamida KXDR suverenitetini shubha ostiga qo‘yishga urinayotganini ta’kidladi.

“Bundan tashqari, Tokio Pxenyanning o‘g‘irlangan yapon fuqarolari masalasi hal etilgani haqidagi pozitsiyasiga qo‘shilmaydi”, deya xulosa qilgan Kim Yo Chjon.

Ma’lumot uchun, sobiq bosh vazir Sindzo Abe birinchi marta 2018 yilda KXDR yetakchisi bilan hech qanday shartlarsiz uchrashish niyatida ekanini bildirgan, shundan so‘ng bu pozitsiya Yaponiya hukumati uchun mos bo‘ldi. O‘shanda hatto Yaponiya bosh vazirining KXDRga tashrifi ehtimoli ham muhokama qilingan, biroq u hech qachon amalga oshmagan.  

O‘tgan yili Fumio Kisida ham o‘g‘irlab ketilgan fuqarolar masalasini hal qilish uchun Shimoliy Koreya yetakchisi Kim Chen In bilan shaxsiy uchrashuv o‘tkazishga tayyorligini ma’lum qildi. Lekin bu safar ham uchrashuv bo‘lmadi.