Yaponiya zilziladan keyin: vayronalar, qutqaruv ishlari, jabrdiyda odamlar (fotoreportaj)

Avvalroq, Yaponiyaning janubidagi Kumamoto prefekturasida kuchli zilzila sodir bo‘lgani haqida xabar berilgan edi. Ma’lum bo‘lishicha, zilzila oqibatida kamida 13 kishi halok bo‘lgan. Hozirda hududda favqulodda xizmatlarning qutqaruv ishlari olib borilmoqda. Bu haqda “The Japan Times” xabar berdi.

Rasmiylar qurbonlar soni ortishi mumkinligini bildirgan. Qutqaruvchilar vayronalar ostida qolgan odamlarni izlash ishlarini davom ettirmoqda.

Eng katta zarar Kumamoto prefekturasining Kashima shahridagi Aeon Mall savdo markazida kuzatilgan. Zilziladan keyin ushbu hududda portlash sodir bo‘lib, binolarning bir qismi qulab tushgan. Qutqaruvchilar savdo markazi vayronalari ostida qolgan 8 kishini tirik holda olib chiqqan.

Qayd etilishicha, zilzila oqibatida minglab uylar elektr ta’minotisiz qolgan. Kumamoto prefekturasida 34 mingdan ortiq xonadon elektrsiz qolgan, ayrim hududlarda suv ta’minotida ham uzilishlar kuzatilgan.

Hududda yuzlab qutqaruvchilar, politsiya va Yaponiya o‘zini o‘zi himoya qilish kuchlari vakillari ish olib bormoqda. Harorat 34 darajagacha ko‘tarilgani sababli favqulodda xizmatlar qutqaruv ishlarini og‘ir sharoitlarda olib bormoqda.

Shuningdek, Nippon Paper Industries zavodida mo‘ri qulagani, yo‘llar va transport infratuzilmasiga zarar yetgani ma’lum qilingan. Ayrim tezyurar poyezd qatnovlari xavfsizlik tekshiruvlari sabab vaqtincha to‘xtatilgan.

Yaponiya Meteorologiya agentligi aholini yaqin kunlarda takroriy kuchli zilzilalar xavfidan ogoh bo‘lishga chaqirgan.

Eslatib o‘tamiz, joriy yilning 24 iyun kuni kechqurun Venesuela shimolida sodir bo‘lgan zilzila oqibatida kamida 164 kishi halok bo‘lgan va 971 kishi jarohatlangandi.