Япония зилзиладан кейин: вайроналар, қутқарув ишлари, жабрдийда одамлар (фоторепортаж)

Аввалроқ, Япониянинг жанубидаги Кумамото префектурасида кучли зилзила содир бўлгани ҳақида хабар берилган эди. Маълум бўлишича, зилзила оқибатида камида 13 киши ҳалок бўлган. Ҳозирда ҳудудда фавқулодда хизматларнинг қутқарув ишлари олиб борилмоқда. Бу ҳақда “The Japan Times” хабар берди.

Расмийлар қурбонлар сони ортиши мумкинлигини билдирган. Қутқарувчилар вайроналар остида қолган одамларни излаш ишларини давом эттирмоқда.

Энг катта зарар Кумамото префектурасининг Кашима шаҳридаги Aeon Mall савдо марказида кузатилган. Зилзиладан кейин ушбу ҳудудда портлаш содир бўлиб, биноларнинг бир қисми қулаб тушган. Қутқарувчилар савдо маркази вайроналари остида қолган 8 кишини тирик ҳолда олиб чиққан.

Қайд этилишича, зилзила оқибатида минглаб уйлар электр таъминотисиз қолган. Кумамото префектурасида 34 мингдан ортиқ хонадон электрсиз қолган, айрим ҳудудларда сув таъминотида ҳам узилишлар кузатилган.

Ҳудудда юзлаб қутқарувчилар, полиция ва Япония ўзини ўзи ҳимоя қилиш кучлари вакиллари иш олиб бормоқда. Ҳарорат 34 даражагача кўтарилгани сабабли фавқулодда хизматлар қутқарув ишларини оғир шароитларда олиб бормоқда.

Шунингдек, Nippon Paper Industries заводида мўри қулагани, йўллар ва транспорт инфратузилмасига зарар етгани маълум қилинган. Айрим тезюрар поезд қатновлари хавфсизлик текширувлари сабаб вақтинча тўхтатилган.

Япония Метеорология агентлиги аҳолини яқин кунларда такрорий кучли зилзилалар хавфидан огоҳ бўлишга чақирган.

Эслатиб ўтамиз, жорий йилнинг 24 июнь куни кечқурун Венесуэла шимолида содир бўлган зилзила оқибатида камида 164 киши ҳалок бўлган ва 971 киши жароҳатланганди.